Jas polıglottar 35 kún boıy aıtýly halyqaralyq sharaǵa qatysyp, sheteldik meımandarǵa kórmeniń jeke aımaq pavılondaryn tanystyryp, mártebeli sharaǵa belsene atsalysyp qaıtty.
Kúngeılik jas tolqynnyń eńbegin elegen uıydastyrýshylar tarapy úsh tildi jetik meńgergen jastarǵa zor qurmetpen alǵys hat tapsyryp, arnaıy marapattady.
Mundaı qýanyshty habardy oblystyq jastar saıasaty máseleleri jónindegi basqarmasynyń basshysy Balmarjan Narbekova málimdep otyr. Aıtýynsha, bul ıgi bastama mádenı sharaǵa qatysyp qaıtqandardy qanattandyryp qana qoıǵan joq, tıisinshe kúngeılik jastolqynnyń úsh tildi meńgerýge degen qulshynysyn arttyrǵan. Iaǵnı, bul arqyly Elbasymyzdyń «Úsh tuǵyrly til» memlekettik baǵdarlamasy da júıeli júzege aspaq.
«Óte áserli boldy. Qýanyshtymyn! Umytylmaıtyn sátter! «Nur Álem» pavılony men ózge de jeke-aımaqtardyń erekshelikteri men mán-mazmunyn baǵamdap, bolashaqqa qajetti degen energıa-qýat kózin atap ótip, sheteldikter aldynda tolyǵymen tanystyrý - men úshin úlken mártebe boldy. Elimizdiń búgingi jetistikterimen tanystyrǵanda boıymdy qýanysh, maqtanysh sezimderi kernegenin jasyra almaımyn. Sondaı-aq, halyqaralyq kórmede jáı júrgen joqpyn, qajetti aqparlardy oıyma túıip, qaǵazǵa túrtip aldym. Keleshekte men de ǵalym bolyp, elimniń órkendeýine úles qossam degen jospar túzdim» – dep, jas eriktiler jasaǵanyń tóraıymy Botakóz İztileý «EKSPO» kórmesinen alǵan áserimen bólisti.
Eske sala óteıik, "EKSPO-2017" halyqaralyq kórmesine osydan 1 aı buryn Ońtústiktiń 150 jasy attanǵan bolatyn. Ázirge, onyń 135-i keldi. Úzdik dep tanylǵan 15 jas elordamyz – Astanada qalyp, tórtkúl dúnıege Qazaqstannyń tyń týyndylaryn tanystyrýdy jalǵastyrmaq.
OQO Jastar saıasaty máseleleri jónindegi basqarmasynyń baspasóz qyzmeti
