Jambyl oblysynda merzimdi áskerı qyzmette júrgen sarbaz qaıtys boldy. Elimizdiń Bas prokýratýrasy isti qatań baqylaýǵa alǵan, dep habarlaıdy Dalanews.kz

Oqıǵanyń aldyndaǵy mán-jaılardy obektıvti jáne jan-jaqty (komısıalyq) anyqtaý maqsatynda Qorǵanys mınıstriniń orynbasary, Bas áskerı prokýror jáne İİM Áskerı-tergeý departamentiniń bastyǵy oqıǵa ornyna shyqty.

Aǵymdaǵy jyldyń 27 qańtarda Jambyl oblysynda qarýdy ustaý kezinde ajaldy jaraqat alǵan merzimdi qyzmettegi áskerı qyzmetshiniń qaıtys bolý faktisi boıynsha İİM-niń áskerı-tergeý organdary sotqa deıingi tergep-tekserýdi bastady - dep jazylǵan resmı habarlamada.

Sonymen qatar, bul toptyń aldyna elimizdiń tıisti áskerı bólimderinde áskerı tártiptiń saqtalýy men jeke quramnyń qaýipsizdik talaptarynyń saqtalýyna jan-jaqty tekserýdi uıymdastyrý tapsyryldy.

Budan bólek, áskerı qyzmetshilerdiń ómiri men densaýlyǵyn saqtaý, merzimdi qyzmetti ótkerý qaýipsizdigi máseleleri jaqyn arada Bas prokýratýranyń arnaıy Alqa májilisinde qaralatyn bolady.