Bıyl joba aıasynda Soltústik, Shyǵys, Batys Qazaqstan, Aqtóbe, Aqmola, Qostanaı, Pavlodar, Qaraǵandy, Atyraý oblystaryndaǵy joǵary jáne ornaýly orta oqý oryndaryna 4513 grant bólingen. Onyń 3793-i joǵary oqý oryndaryna, qalǵany kolejderge bólinip otyr.
Aıta ketý kerek, búgingi tańda Ońtústik Qazaqstan oblysynan 5627 jas osy joba aıasynda bilim alyp jatyr. Alǵashqy qatysýshylar dıplom alyp, jumysqa ornalasyp úlgergen.
Jobanyń artyqshylyǵy sol, halqy tyǵyz ornalasqan ońtústik jastarynyń tegin bilim alýyna, óz mamandyǵy boıynsha jumysqa ornalasýyna múmkindik beriledi. Jumyssyzdyq, balabaqsha, mektep jetispeýshilik sekildi birqatar áleýmettik máselelerdiń oń sheshim tabýyna yqpal etedi. Eń bastysy, halqy sırep jatqan soltústik óńirler qarakózdermen tolyǵady.
Aıta keteıik, sońǵy úsh jylda 9 oblysqa – Soltústik, Shyǵys, Batys Qazaqstan oblystary men Aqtóbe, Aqmola, Qostanaı, Pavlodar, Qaraǵandy jáne Atyraý oblystaryna 5627 túlektiń 4698-i joǵary oqý ornyna tússe, 929 talapker kolejderde bilimin jalǵastyrǵan. Iaǵnı, 2014 jyly «Serpin-2050» baǵdarlamasy aıasynda joǵary oqý oryndaryna 1050 grant bólinip, 540 talapker oqýǵa tússe, 2015 jyly 5000 grant bólinip óńirimizden 2580 túlek oqýǵa túsken. Al 2016 jyly 3162 grant bólinip, 1578 talapker grant ıegeri atanǵan.
OQO ákiminiń baspasóz qyzmeti
