Elbasynyń «Bolashaqqa baǵdar: rýhani jańǵyrý» maqalasyndaǵy «Týǵan jer» baǵdarlamasy aiasynda ótkizilip otyrǵan is-shara jastardy tabiǵatty aialap qorǵaýǵa shaqyrý arqyly jańa qazaqstandyq patriotizm rýhynda tárbieleýge belsene atsalysý maqsatynda ótkizilip otyr.
Festivaldiń ashylý saltanatynda sóz alǵan oblys ákimi J.Túimebaev alqyzyl qyzǵaldaqtyń eń ádemileri Aqsý-Jabaǵylynda jáne Shubaiqyzyl atalatyn teńdesi joq tóbede ósetinin atap ótti.
– Shubaiqyzyl shoqysy elimizdiń «Qyzyl kitabyna» engizilgen greig qyzǵaldaǵy eń kóp ósetin aýmaq. Bul qyzǵaldaqtar Qazyǵurt, Tólebi, Báidibek óńirlerindegi taýly aýmaqtarda kezdesedi. Qyzǵaldaq gúli qazaq halqynyń túsiniginde – kóktemniń, jańa ómirdiń, kórikti tirshiliktiń jarshysy bolyp esepteledi. Osyndai ásem tabiǵatty aialap, týǵan jerdi qadirleý barshamyzdyń mindetimiz. Sondyqtan da biyldan bastap ár aimaqta qoǵamdyq sanany jan-jaqty jáne túbegeili jańǵyrtýǵa baǵyttalǵan «Rýhani jańǵyrý» baǵdarlamasy aiasynda aýqymdy sharalar ótkizý jáne olardy dástúrge ainaldyrý kózdelip otyr, – dedi ákim.
«Tekti tórim – Túlkibasym» teatrlandyrylǵan - horeografiialyq qoiylymmen bastaý alǵan is-sharada «Shurailym - Shubaiqyzylym» jas qalamgerler baiqaýynyń jeńimpazdary marapattalyp, kórermenderge arnalǵan kontserttik baǵdarlamamen ulasty.
Sondai-aq, jastarǵa onyń tarihy jaily maǵlumat berilip, jas aqyndardyń óleńderi oqylyp, tabiǵat taqyrybynda kórme men jas sýretshilerdiń sýret baiqaýy ótkizildi. Jalpy is-sharaǵa 5 myń shamasynda adam qamtyldy. Sonymen birge kelýshiler qylqalam jáne foto sýretshilerdiń kórmesi men memlekettik tabiǵi parkter sherýin tamashalady.
Jylyna bir ret nebári 10-15 kún ǵana gúldeitin qyzǵaldaqtar tirshilik jańarǵan shaqta 20 gektar jerdi alyp jatqan alqap qyzyl kilemge oranǵandai ásem túrge enedi. Tarihta bul jerdi «Krasnaia gorka», keiinnen «Qyzyl tóbeshik» dep atasa, qarymdy qalamger M.Baiǵut bastamasymen «Shubaiqyzyl shoqysy» ataýy qaita berildi.Búgin atalǵan tóbege "Qyzǵaldaq" belgisi ornatyldy.
Qyzǵaldaq – lalagúlder tuqymdasyna jatatyn kóp jyldyq shóptesin piiazshyqty ósimdik. Qazaqstannyń dalalyq aimaqtarynda jii kezdesedi, 32 túri bar, onyń 11 túri – Qazaqstannyń endemigi bolyp sanalady. Qyzǵaldaq ásemdik jáne gúlinen hosh iisti zat alý úshin ósiriledi. Qyzǵaldaqtyń óte sirek kezdesetin 13 túri (Albert qyzǵaldaǵy, Borshov qyzǵaldaǵy, Greig qyzǵaldaǵy, Kaýfman qyzǵaldaǵy, Shrenk qyzǵaldaǵy, t.b.) qorǵaýǵa alynyp, Qazaqstannyń «Qyzyl kitabyna» engizilgen. Qyzǵaldaq – piiazshyqtardyń ishindegi tabiǵatta keń taralǵan, kógaldandyrýda da jii paidalanatyn ósimdik.
Aita keteiik, sońǵy jyldary ońtústiktiń tamasha tabiǵatyna tamsanyp ketetin sheteldikterdiń qatary arta túsken. Máselen, 2017 jyldyń qorytyndysy boiynsha óńirimizge 270 myńnan asa týrist kelgen. Olar tumsa tabiǵattan bólek, tarihi, arhitektýralyq jáne arheologiialyq eskertkishterge degen erekshe qyzyǵýshylyǵy baryn baiqatqan.
OQO ákiminiń baspasóz qyzmeti
