Ońtústik Qazaqstan oblysy, Tóle bı aýdanynda bıylǵy jyly 20 aýyl sharýashylyǵy kooperatıvi quryldy. Osynyń biri qus etin óndiretin «Lenger qus» aýyl sharýashylyǵy óndiristik kooperatıvi. 20 músheniń basyn qosatyn aýylsharýashylyǵy kooperatıvine birikken qus fermasynyń qurylysy aıaqtalýǵa jaqyn.
Jyl aıaǵyna deıin iske qosylatyn nysanda jylyna 200 tonnaǵa deıin qus eti óndiriletin bolady. Búginde kásiporyn ǵımaratyna jańa qural-jabdyqtar ákelinip, ornatylýda. Sý jańa qural-jabdyq tolyqtaı avtomattandyrylǵan. 2,5 gektardy alyp jatqan qus fermasynyń qazir ınfraqurylymy jasaqtalýda. Sharýalardyń kooperatıvke birigýiniń arqasynda muny satyp alýǵa ketken shyǵynnyń 50 paıyzy memleket tarapynan sýbsıdıalanyp otyr.
Kooperatıv tóraıymynyń aıtýynsha, ótkizgen ettiń ár kelisine 80 teńgeden, al jemge 20 teńgeden sýbsıdıa alatyn bolady. Joba tolyqtaı iske qosylǵanda jylyna 200 tonnaǵa jýyq qus etin óndiremiz dep otyrǵan sharýalar taýarlaryn «Shymkent qus» kásipornyna ótkizedi. Jylyna 6 aınalymda jumys isteıtin qus fermasy qustardy 35-40 kún baǵatyn bolady.
Salaǵa jaýaptylar búginde oblysta 2,5 mıllıonǵa jýys qus ósiriledi dep otyr. Onyń 50 paıyzy jeke jáne qosalqy sharýashylyqtardyń enshisinde. Ońtústik óńiri óz-ózin qus etimen 70 paıyz, al jumyrtqamen 75 paıyz qamtýǵa qaýqarly eken. Sondyqtan birikken kásiporyndar aldynda qus sharýashylyǵyn damytyp, ónim kólemin arttyrý maqsaty tur.
Qus fermasyn salyp jatqan kásipkerler qural-jabdyqtar satyp alý úshin jáne aınalym qoryna (jem, shóp satyp alýǵa) qajetti qarjyny QR Úkimetiniń bekitken baǵdarlamalary aıasynda jeńildetilgen nesıe alý arqyly iske asyrýda. Atap aıtsaq, 14 kásipker tıisti qujattaryn «Yrys» MQU, «Ońtústik» AIO JSHS arqyly ótkizip, qondyrǵylaryn «ǴOPRO» fırmasynan «Lızıń» boıynsha alady. Al 6 kásipker qondyrǵylaryn «QazQus-Batareıasy» JSHS-nen alý úshin kelisim shart jasaýda.
OQO ákiminiń baspasóz qyzmeti
