Ońtústikte 150 dáriniń baǵasy jyl sońyna deiin kóterilmeidi
Oblys ákimdikte ótken memorandýmǵa qol qoiý sharasyna oblys ákimi Janseiit Túimebaev pen dárihana uiymdary tarapynan 40 farmatsevtikalyq uiym basshylary qatysty. Endi otandyq dárilik zattar men meditsinalyq buiymdardy óndirýshi kompaniialar men sheteldik taýarlardyń resmi distribiýtorlary 150 dárilik zattyń baǵasyn jyl sońyna deiin kótermeitin bolady.
«Memorandýmǵa 150 túrli dári-dármek engizilip otyr. Óitkeni bul dárilerdiń áleýmettik mańyzy zor. Osylaisha biz oblys turǵyndarynyń basym bóligine qoldaý kórsetemiz. Halyqtyń áleýmettik álsiz toptaryna qoldaý bildirip, kelisimge qol qoiyp otyrǵan dárihana basshylaryna ońtústik jurtynyń atynan rizashylyǵymdy bildiremin»,- dedi Janseiit Qanseiituly.
Aita keteiik, bul jolǵy kelisim oblystaǵy farmatsevtik mekemeler men dárihanalarda satylatyn dárilik zattardy turaqty baǵada ustaýǵa, sonymen qatar baǵanyń negizsiz kóterilýinen tutynýshylar quqyǵyn qorǵaý jáne áleýmettik alańdaýshylyqty boldyrmaýǵa arnaldy.
Farmatsevtikalyq qyzmetti baqylaý departamentiniń basshysy L. Qashqymbaeva iri tasymaldaýshy firmalarmen kelisimsharttar jasalyp jatqanyna toqtaldy. Sondai-aq ol dárihanalar jelileriniń áleýmettik jaýapkershiligi týrasynda da atqaryp jatqan jumystaryn baiandady.
Kezdesýge qatysýshylar tiisti memorandýmǵa qol qoiý halyq arasynda áleýmettik turaqtylyqty qamtamasyz etýde mańyzdy qadam ekendigin atap ótti.
OQO ákiminiń baspasóz qyzmeti
