Oblys ákimi birinshi bolyp indýstriialdy aimaqtaǵy shyny ydystar shyǵarý isimen tanymal «Evrokristall» zaýytynyń ónimimen tanysty. Ondaǵy óndiriletin ónimderdi gazdalǵan sýsyndar men shyryndar, alkogoldik jáne sút pen dári-dármekter shyǵaratyn zaýyttar qoldanady. Munda túrli qalypta – 200 millioan 3 litrge deiingi tússiz jáne jasyl tústi bótelkeler men qutylar ázirlenedi. Osynaý ónimderge Qazaqstannyń barlyq aimaǵy men Qyrǵyzstannan tapsyrystar kelip túsýde. Jylyna 60 mln dana shyny shyǵarýǵa qaýqarly óndiris ornynda 150 adam jumyspen qamtylǵan.
Zaýyt jumysymen tanystyrǵan kásiporyn iesi aimaq basshysyna jumys isteý aiasyn keńeitip, kómirqyshqyl gazyn óndirýdi qolǵa alyp jatqanyn jetkizdi. Ol úshin kásipker arnaiy italiandyq qurylǵylardy da satyp alýdy josparlap qoiypty.
Munan bólek, J.Túimebaev shifer shyǵaratyn kásiporyn – «Tectum Enjineering» JShS-gin aralap kórdi.
Shifer óndiretin alǵashqy kásiporyn «Biznestiń jol kartasy – 2020» baǵdarlamasy aiasynda qarjylandyrylǵan. Joba quny 1,9 mlrd. teńgeni quraidy. Zaýyt «Hatchek» ádisimen ónim shyǵarady. Munda 200 adam jumyspen qamtylyp, shyǵarylǵan ónimniń 60 paiyzy ishki naryqqa, al qalǵan 40 paiyzy Tájikstan, Aýǵanstan men Ózbekstan elderine jóneltilýde. Zaýyt jylyna 2,3 mln. dana shifer óndirý múmkindigine ie.
Sondai-aq, ákim zamanaýi shyny shyǵarýda shetelden kem túspeitin ári sáýlet qurylysynda qoldanýǵa yńǵaily áinek shyǵaratyn «Firma Dana» zaýytynyń ónimimen tanysty. Shyńdalǵan shyny óndiretin zaýyt táýligine 1700 sharshy metr áinek shyǵarady. Jańa tehnologiiaǵa negizdelgen shyny qysta úidegi jylýdy saqtasa, jazda bólmedegi temperatýrany birqalypty kúide ustaidy. Bul shynylardyń tiimdiligi jylý ótkizgishtiginde.
Sapar sońynda oblys ákimi J.Túimebaev «Ońtústik» indýstrialdyq aimaǵy óńirdegi aýdan, qalaǵa úlgi bolýy kerektigin aityp, onda ornalasqan kásiporyndardyń jumysyn oń baǵalady. Sonymen qatar, kásipkerlerge memleket tarapynan kórsetiletin qoldaýlardy atap ótip, óńirdiń ekonomikasynyń damýyna aitarlyqtai úles qosyp otyrǵan isker azamattarǵa aldaǵy jumystaryna sáttilik tiledi.
Aita keteiik, «Ońtústik» indýstriialdy aimaqta jalpy somasy 55,8 mlrd teńge bolatyn bes myń jumys ornymen 85 joba júzege asyrylýda. Búgingi tańda munda quny 21,4 mlrd. teńge bolatyn 46 joba iske qosylyp, úsh myń adam jumyspen qamtylyp otyr.
OQO ákiminiń baspasóz qyzmeti
