Ońtústik Qazaqstanda jańa sý elektr stantsiiasy iske qosyldy
Búgin Ońtústik Qazaqstan oblysyndaǵy Sairam aýdanynda «Mankent» shaǵyn sý elektr stantsiiasy iske qosyldy.
Halyqty turaqty ári sapaly elektr energiiasymen qamtityn sý elektr stantsiiasynyń ashylý saltanatyna oblys ákimi Janseiit Túimebaev pen «Aqsý-Energo» JShS-niń direktory Anarbek Orman qatysty.
«Aqsý Energo» JShS-niń bul jobasy «Biznestiń jol kartasy 2020» baǵdarlamasy aiasynda qoldaý tapqan. Bul stantsiia jylyna 2,5 MVt elektr qýatyn óndirýge qaýqarly. Joba quny 283 mln.teńge bolatyn kásiporynda 6 adam jumyspen qamtylǵan.
Oblysta kún, jel, sý energiiasynyń áleýeti joǵary ekenin aitqan ákim, dástúrli energiia kózderimen qatar, jańa energetikany da damytý qajettigin atap ótti.
«Ózderińizge belgili, biyl Astana qalasynda «Bolashaq energiiasy» taqyrybynda EKSPO-2017 halyqaralyq mamandandyrylǵan kórmesi ótip jatyr. Álemdik deńgeide ótkizilip jatqan EKSPO-2017 halyqaralyq kórmesi tehnikalyq jetistiktermen, jańǵyrmaly energiia kózderiniń moldyǵymen, ǵylymǵa umtylýdyń mańyzdylyǵymen búkil álemniń nazaryn aýdarýda. Memleket basshysy N.Á.Nazarbaev 2050 jylǵa deiin jańǵyramaly energiia úlesin 50 paiyzǵa deiin kóbeitýdi qamtamasyz etýdi tapsyrdy. Búgingi iske qosylǵan elektr stantsiiasy taza elektr energiia óndirýmen qatar, energo resýrstardy únemdeýge baǵyttalǵan»,-dedi ákim óz sózinde.
Jalpy «jasyl ekonomikaǵa» kóshý jónindegi tujyrymdamaǵa sáikes, Sairam aýdanynda 2 joba iske qosylyp otyr.
«Aqsý Energo» JShS-i 2014 jyly «Kún nurynan elektr qýatyn óndiretin qýattylyǵy 1MVt bolatyn «Aqbai» elektr stantsiiasyn iske qosqan bolatyn. Quny 300 mln.teńge bolatyn elektr stantsiiasy 2016 jyly 987,166 MVt energiia kózin óndirgen.
Eki joba tolyq qýattylyqta jumys istegende aýdannyń energiia kózine degen suranysynyń altydan birin qamtityn bolady.
