Ońtústik Koreia prezidenti ákimshiliginiń basshysy Kan Hýn Sik Qazaqstanǵa jáne Parsy shyǵanaǵy elderine jumys saparymen keledi. Bul týraly Yonhap agenttigi málimdedi, dep habarlaidy Dalanews.kz.
Sapardyń basty maqsaty – Ormuz buǵazy arqyly keme qatynasynyń buzylýyna bailanysty shiki munai men nafta jetkizilimin turaqtandyrý joldaryn talqylaý. Qazirgi jaǵdaida bul baǵyttaǵy qozǵalys aitarlyqtai shektelgen. Sonymen qatar AQSh prezidenti Donald Tramp Iranǵa qatysty qysymdy kúsheitip, Tegerannan mańyzdy teńiz jolyn ashýdy talap etken.
Kan Hýn Sik prezidenttiń arnaiy ókili retinde Qazaqstanda, sondai-aq Oman men Saýd Arabiiasynda kelissózder júrgizedi. Ol úkimet ókilderimen, energetikalyq kompaniialarmen jáne keme operatorlarymen kezdesip, júkterdi Ońtústik Koreia porttaryna jetkizýdi qamtamasyz etý jáne negizgi taýarlardyń turaqty jetkizilimin saqtaý máselelerin talqylaidy.
Onyń aitýynsha, qazirgi tańda úkimettiń basty mindeti – halyqqa qajet negizgi ónimderdiń úzdiksiz jetkizilýin qamtamasyz etý. Sebebi Ońtústik Koreia áli de Taiaý Shyǵystan importtalatyn munai men naftaǵa táýeldi. Al nafta – munai-himiia jáne ózge de óndiris salalary úshin mańyzdy shikizat.
Kannyń málimetinshe, ótken aida Birikken Arab Ámirlikterinen 24 million barrel munaidy basym tártippen jetkizý týraly kelisim jasalǵan. Qazir bul jetkizilimder ońtústikkoreialyq porttarǵa kelip jatyr.
Sondai-aq ol Taiaý Shyǵystaǵy jaǵdai tolyq turaqtalǵanǵa deiin uzaq merzimdi jetkizilimderdi qamtamasyz etý mańyzdy ekenin atap ótti.
Budan bólek, Ońtústik Koreia biligi Ormýz buǵazynda turǵan 26 keme qaýipsizdigin qamtamasyz etý sharalaryn qolǵa alǵan. Bul kemeler aqpan aiynyń sońynda AQSh pen Izraildiń Iranǵa jasaǵan shabýyldarynan keiin buǵazda turyp qalǵan. Qazirgi tańda ekipaj qaýipsizdigi basty nazarda.
Keiingi ýaqytta Ońtústik Koreia energiia kózderin ártaraptandyrýǵa kúsh salyp keledi. Sebebi el shiki munaidyń shamamen 70 paiyzyn Taiaý Shyǵys elderinen importtaidy. Bul jaǵdai jetkizilimderdiń úzilýi men baǵanyń kúrt ózgerýine táýeldilikti kúsheitedi.
