Sharaǵa OQO ákiminiń orynbasary U.Sádibekov pen aýdan, qala «Jastar resýrstyq ortalyqtarynyń» basshylary men úkimettik emes uiym ókilderi, joǵary jáne orta arnaýly oqý oryndarynyń stýdentteri, BAQ ókilderi qatysty.
Atap aitqanda, qol kúresten shymkenttik Maǵjan Shámiev eshkimge des bermei, 1-oryndy alsa, 2-oryn jerlesi Aqtai Talǵatqa, 3-oryn shardaralyq Ábilda Erjanǵa buiyrdy.
Arqan tartý saiynynan maqtaraaraldyq jastarǵa eshkim teń kelgen joq. Kúsh atasy – Qajymuqannyń izbasarlary retinde shymkenttik qatysýshylar 2-oryndy, tólebilik jastar 3-oryndy iemdendi.
Al kir tasyn kóterip saiysqa túskenderden 1-oryndy Shardara aýdanynan Ainabek Murat, 2-oryndy Saryaǵash aýdanynan Baqytjan Turdyqulov, 3-oryndy Tólebi aýdanynan Muhtarjan Seraliev iemdendi.
"Ulttyq qol óner shyǵarmashylyǵy" baiqaýynan 1-oryn Qanat Keńesovke (Saryaǵash aýdany) buiyrsa, 2-oryn Janaiym Nurdillaevaǵa (Shymkent) tabystaldy. 3-oryn Aqerke Joldasqa (Báidibek aýdany) berildi.
Al "Dástúrli án salý" saiysy boiynsha sozaqtyq jastyń baǵy men baby qatar shapty. Án aitýdan Eldos Júsipovtiń mereii ústem bolsa, shymkenttik arý Ailez Nazerke de júldeli ekinshi oryndy qanjyǵasyna bailady. Úzdik úshtiktiń quramynda Tólebi aýdanynyń namysyn qorǵap kelgen Hanybek Toqtaqulov ta bar.
OQO ákiminiń baspasóz qyzmeti
