17 aqpanda Ulttyq qaýipsizdik komiteti Aqtóbe, Atyraý, Shyǵys Qazaqstan, Jambyl, Batys Qazaqstan, Túrkistan, Jetisý oblystary jáne Shymkent qalasynda 8 topty áshkereledi, - dep habarlaidy Dalanews.kz.
Olardyń ortasynda destrýktivti dini aǵym jaqtastary bar 23 adam ustaldy.
17 adam ýaqytsha ustaý izoliatoryna qamaldy, al 6 adamǵa kelý týraly mindetteme qoldanyldy.
"Olar aýyr jáne asa aýyr qylmystarǵa, sonyń ishinde terrorizmdi nasihattaý, adamdardy urlaý, qorqytyp alý, sondai-aq, esirtki zattary men atys qarýynyń zańsyz ainalymyna qatysy bar degen kúdikke ilindi", - dep jazylǵan UQK málimetinde.
Olar quqyqqa qarsy áreketterin teris burmalanǵan dini qaǵidalarmen aqtap júrgen.
Tintý barysynda atys qarýy, oq-dáriler, dini ádebietter, qarajat jáne esirtkiler tárkilendi.
