Senat depýtaty Gennadii Shipovskih Almatydaǵy Respýblikalyq psihiatriialyq aýrýhanany jańǵyrtý qajet ekenin málimdedi. Onyń aitýynsha, nysan qazir syn kótermeitin jaǵdaida tur, dep habarlaidy Dalanews.kz.
Bul – eldegi jalǵyz ortalyq, munda sot sheshimimen asa qaýipti qylmys jasaǵan psihikalyq aýytqýy bar adamdar májbúrli em qabyldaidy. Alaida qazirgi ahýaly tek naýqastar úshin emes, jalpy qoǵam úshin de qater tóndirýde.
"Terroristik jáne ekstremistik uiym músheleri, kisi óltirýshiler men ózge de asa qaýipti qylmyskerler ustalyp otyrǵan mekeme sanitarlyq normalarǵa da, qaýipsizdiktiń qarapaiym talaptaryna da sai kelmeidi. 1972 jyly salynǵan ǵimaratqa eshqashan kúrdeli jóndeý jasalmaǵan, lifti men pandýstary joq, seismikalyq turǵydan kúsheitilmegen, al álsiz qorshaý jaǵdaidy odan saiyn ýshyqtyryp tur. Osyndai jaǵdaida biz qoǵam úshin erekshe qaýip tóndiretin adamdardy baqylaýda ustap otyrmyz. Bul – jol berýge bolmaityn qasiret qaýpin týdyrady", – dedi Shipovskih óz depýtattyq saýalynda.
Senator kadr tapshylyǵyna da nazar aýdardy: 750 shtattyq birliktiń tek 647-si ǵana toltyrylǵan. Onyń sózinshe, tómen jalaqy men áleýmettik paketiniń bolmaýy qyzmetkerlerdi, ásirese kishi meditsinalyq personaldy jáne sharýashylyq sala mamandaryn ustap qalýǵa múmkindik bermei otyr. Bul strategiialyq nysan jumysynyń turaqsyzdyǵyn odan saiyn kúsheitýde.
Shipovskih aýrýhanany strategiialyq nysandar qataryna qosýdy, jańa korpýs salýdy, kúrdeli jóndeý júrgizýdi, injenerlik júielerdi jańǵyrtýdy, sondai-aq qyzmetkerlerge áleýmettik paketpen birge eńbekaqyny arttyrýdy usyndy.
