– QR Prezidentiniń tapsyrmasyna sáikes, biylǵy jyldan bastap Túrkistan qalasyn jasyl qalaǵa jáne aýa-raiyn qolaily klimatqa ainaldyrý maqsatynda Túrkistan qalasynyń ainalasynda «Jasyl beldeý» qalyptastyrý jumystary júrýde. Jasyl beldeýdiń jalpy aýmaǵy 7700 gektar jerdi quraidy. Bul jerge 3,5 million aǵash kóshetteri men 500 myńǵa jýyq butaly ósimdikter egilmek, – dedi Ómirzaq Estaiuly respýblikalyq BAQ ókilderimen kezdesý barysynda.
Bul maqsatta 2019 jyldyń kókteminde 160 myń kóshet otyrǵyzylsa, kúzgi mezgilde 2000 gektar jerge 478 myń kóshet jáne 300 gektar tálimbaqta 400 myńǵa jýyq seppe kóshet otyrǵyzý jumystar júrip jatyr.
2020 jyldan bastap, ǵylymi zerthanalardyń bilikti mamandaryn tarta otyryp, oblys ákimdigi tarapynan «Jasyl beldeýdegi» tálimbaqta Túrkistan qalasynyń klimatyna tez beiimdeletin ekpe kóshet jáne kópjyldyq gúldeitin shópterdi suryptaý boiynsha jumystar atqarylatyn bolady.
Túrkistan qalasyn kógaldandyrý maqsatynda qala 32 sektorǵa bólingen. Ár sektorǵa jaýapty aýdan, qala óz aýmaǵynda aǵash otyrǵyzý jáne abattandyrý jumystaryn qarqyndy júrgizýde. Sondai-aq Túrkistan qalasynda 268 sý uńǵymasyn jasaý josparlansa, sonyń ishinde 57 sý uńǵymasy iske qosylǵan.
Keler jyldyń kókteminde tálimbaqta oblysta jáne elimizde joq, ózge memleketterde ósetin ósimdikterdi jersindirý boiynsha tájiribe jasaý josparlanyp otyr. Bul óz kezeginde keibir qylqanjapyraqty tuqymdas túrlerin Túrkistan qalasynyń ainalasyndaǵy «Jasyl beldeýde» ósirý úshin beiimdeý maqsatynda júzege aspaq.
Oblys ákiminiń bastamasymen oblys ortalyǵy Túrkistan qalasynda ótken jalpyhalyqtyq senbilik aiasynda oblys ortalyǵynda 24 myńnan astam tal egildi. Jergilikti turǵyndar da kóne shahardyń jasyl qalaǵa ainalýyna belsene qatysýda.
