Jangeldin aýylynda bir otbasy múshelerin óltirgeni úshin ómir boiyna bas bostandyǵynan aiyrylǵan Sultan Sársemáliev Atyraýdaǵy tergeý izoliatorynda jeke kameraǵa aýystyrylǵan bolýy múmkin, dep habarlaidy dalanews.kz.
"Aq Jaiyq" basylymynyń málimetinshe, bul aqparatty redaktsiiaǵa bir-birine táýelsiz birneshe derekkóz jetkizgen. Alaida ázirge Sársemálievtiń jalpy kameradan bólek ornalastyrylǵany resmi túrde rastalǵan joq.
Derekkózder mundai sheshim sottalýshynyń qaýipsizdigin qamtamasyz etý maqsatynda qabyldanýy yqtimal ekenin aitqan. Mekeme basshylyǵy belgili bir alańdaýshylyqqa bailanysty ony kúsheitilgen baqylaýǵa alyp, ózge qamaýdaǵylardan bólek ustaýdy jón kórgen bolýy múmkin.
Qylmystyq-atqarý júiesi mekemelerinde qamaýdaǵy nemese sottalǵan adamdy qaýipsizdik maqsatynda jeke kameraǵa ornalastyrý tájiribesi bar. Bul shara qosymsha jaza retinde qarastyrylmaidy jáne adamnyń ózine nemese ainalasyndaǵylarǵa tónýi múmkin qaýiptiń aldyn alýǵa baǵyttalady.
Eske salaiyq, Sultan Sársemáliev Jangeldin aýylynda otbasy múshelerin óltirdi dep tanylyp, sot úkimimen ómir boiyna bas bostandyǵynan aiyrylǵan. Atalǵan qylmystyq is qoǵamda úlken rezonans týdyrdy.
Basylym Sársemálievtiń jeke kameraǵa aýystyrylǵany týraly málimetti rastaý jáne mundai sheshimniń sebebin túsindirýdi surap, Atyraý oblysy boiynsha Qylmystyq-atqarý júiesi departamentine resmi saýal joldaǵan.
Material jariialanǵan ýaqytta vedomstvodan jaýap túspegen. Resmi aqparat berilgen jaǵdaida material tolyqtyrylýy múmkin.
