Aqmola oblysynda qaitarylǵan aktivter esebinen sýmen jabdyqtaý júiesin salýǵa 1 mlrd teńgeden asa qarjy bólindi, - dep habarlaidy Dalanews.kz.
Memleket basshysynyń tapsyrmasyna sáikes Úkimet zańsyz iemdenilgen aktivterdi qaitarý arqyly áleýmettik mańyzy bar infraqurylym nysandaryn salyp jatyr.
Aqmola oblysyndaǵy Qosshy jáne Makinsk qalalarynyń turǵyndaryn sýmen qamtamasyz etý úshin arnaýly memlekettik qordan qarajat bólý týraly sheshim qabyldanǵan. Qosshy qalasynda sý qubyry júiesiniń qurylysyn aiaqtaýǵa 476,7 mln teńge bólingen. Jobany iske asyrý nátijesinde halyq 100% ortalyqtandyrylǵan sýmen qamtylady.
"Qazir shamamen 50 shaqyrym qubyr tartylǵan. Jalpy jelilerdiń uzyndyǵy 64,1 shaqyrym bolady dep josparlanyp otyr. Nysandy jyl sońyna deiin tapsyrý kózdelgen. Qoldanystaǵy injenerlik jeli 30 myń turǵynǵa eseptelgen. Al resmi derekterge sáikes búginde Qosshyda 50 myńnan asa adam tirkelgen. Qalanyń bas josparyna sáikes 2038 jylǵa qarai turǵyndar sany 150 myńnan asady dep boljanyp otyr", - dep jazylǵan habarlamada.
Makinsk qalasynda sý qubyry jelilerin qaita jańartý jumystary júrgizilip jatyr. Joba boiynsha 72,7 shaqyrym jeli tartý qarastyrylǵan. Buǵan deiin bólingen qarajat esebinen búginde 45 shaqyrym boiynsha jumys aiaqtalǵan. Arnaýly memlekettik qordan bólingen 606,4 mln teńge jobany tolyq aiaqtap, halqy 18 myńnan asatyn qalany ortalyqtandyrylǵan sýmen qamtamasyz etýge múmkindik beredi.
Aita keteiik, búgingi tańda Arnaýly memlekettik qordan bilim berý, densaýlyq saqtaý, sport, áleýmettik qamsyzdandyrý, injenerlik jeliler men sý qurylystaryn jańartý siiaqty salalardaǵy 280-ge jýyq jobany iske asyrýǵa qarajat bólingen.
Al Bas prokýratýra málimetinshe, búginde memleket paidasyna jalpy somasy shamamen 610 mlrd teńge kóleminde aktivter qaitarylǵan, onyń ishinde 506 mlrd teńge – aqshalai qarajat, 103 mlrd teńge – múlik.
