اقمولا وبلىسىندا قايتارىلعان اكتيۆتەر ەسەبىنەن سۋمەن جابدىقتاۋ جۇيەسىن سالۋعا 1 ملرد تەڭگەدەن اسا قارجى ءبولىندى، - دەپ حابارلايدى Dalanews.kz.
مەملەكەت باسشىسىنىڭ تاپسىرماسىنا سايكەس ۇكىمەت زاڭسىز يەمدەنىلگەن اكتيۆتەردى قايتارۋ ارقىلى الەۋمەتتىك ماڭىزى بار ينفراقۇرىلىم نىساندارىن سالىپ جاتىر.
اقمولا وبلىسىنداعى قوسشى جانە ماكينسك قالالارىنىڭ تۇرعىندارىن سۋمەن قامتاماسىز ەتۋ ءۇشىن ارناۋلى مەملەكەتتىك قوردان قاراجات ءبولۋ تۋرالى شەشىم قابىلدانعان. قوسشى قالاسىندا سۋ قۇبىرى جۇيەسىنىڭ قۇرىلىسىن اياقتاۋعا 476،7 ملن تەڭگە بولىنگەن. جوبانى ىسكە اسىرۋ ناتيجەسىندە حالىق 100% ورتالىقتاندىرىلعان سۋمەن قامتىلادى.
"ءقازىر شامامەن 50 شاقىرىم قۇبىر تارتىلعان. جالپى جەلىلەردىڭ ۇزىندىعى 64،1 شاقىرىم بولادى دەپ جوسپارلانىپ وتىر. نىساندى جىل سوڭىنا دەيىن تاپسىرۋ كوزدەلگەن. قولدانىستاعى ينجەنەرلىك جەلى 30 مىڭ تۇرعىنعا ەسەپتەلگەن. ال رەسمي دەرەكتەرگە سايكەس بۇگىندە قوسشىدا 50 مىڭنان اسا ادام تىركەلگەن. قالانىڭ باس جوسپارىنا سايكەس 2038 جىلعا قاراي تۇرعىندار سانى 150 مىڭنان اسادى دەپ بولجانىپ وتىر"، - دەپ جازىلعان حابارلامادا.
ماكينسك قالاسىندا سۋ قۇبىرى جەلىلەرىن قايتا جاڭارتۋ جۇمىستارى جۇرگىزىلىپ جاتىر. جوبا بويىنشا 72،7 شاقىرىم جەلى تارتۋ قاراستىرىلعان. بۇعان دەيىن بولىنگەن قاراجات ەسەبىنەن بۇگىندە 45 شاقىرىم بويىنشا جۇمىس اياقتالعان. ارناۋلى مەملەكەتتىك قوردان بولىنگەن 606،4 ملن تەڭگە جوبانى تولىق اياقتاپ، حالقى 18 مىڭنان اساتىن قالانى ورتالىقتاندىرىلعان سۋمەن قامتاماسىز ەتۋگە مۇمكىندىك بەرەدى.
ايتا كەتەيىك، بۇگىنگى تاڭدا ارناۋلى مەملەكەتتىك قوردان ءبىلىم بەرۋ، دەنساۋلىق ساقتاۋ، سپورت، الەۋمەتتىك قامسىزداندىرۋ، ينجەنەرلىك جەلىلەر مەن سۋ قۇرىلىستارىن جاڭارتۋ سياقتى سالالارداعى 280-گە جۋىق جوبانى ىسكە اسىرۋعا قاراجات بولىنگەن.
ال باس پروكۋراتۋرا مالىمەتىنشە، بۇگىندە مەملەكەت پايداسىنا جالپى سوماسى شامامەن 610 ملرد تەڭگە كولەمىندە اكتيۆتەر قايتارىلعان، ونىڭ ىشىندە 506 ملرد تەڭگە – اقشالاي قاراجات، 103 ملرد تەڭگە – مۇلىك.
