Premer-Ministr Oljas Bektenov jumys saparymen Shyǵys Qazaqstan oblysyna bardy. Basty maqsat – Memleket basshysynyń energetikalyq jáne áleýmettik infraqurylymdy jańǵyrtý, metallýrgiia jáne farmatsevtika ónerkásibin damytý, sondai-aq kólik-logistika jáne týrizm salasyn damytý jónindegi tapsyrmalarynyń oryndalýyn qadaǵalaý, dep habarlaidy Dalanews.kz.
Oljas Bektenov Ridder JEO-ǵa barǵan kezde jylý kózin rekonstrýktsiialaý qarqynymen tanysty. Qazandyq tsehyn tekserý kezinde Premer-Ministrge №4 jáne 5 qazandyqtardaǵy apattan keiin orta qysymdy qazandyq agregattarynyń TP BAJ jańǵyrtylýy jáne stansany qalpyna keltirý týraly baiandaldy. 1956 jyly paidalanýǵa berilgen JEO búginde 50 myńǵa jýyq turǵyndy jylýmen qamtamasyz etip otyr. Jabdyqtyń aǵymdaǵy tozýy 57,7%-dy quraidy. Ridder JEO «qyzyl aimaqqa» jatatyn 19 jylý kóziniń tizimine engen. Memleket basshysy biylǵy aqpanda ótken keńeitilgen otyrysta Úkimet aldyna osyndai nysandardy shuǵyl jańǵyrtý jumystaryn biyl aiaqtaý mindetin qoiǵan bolatyn.
2024 jyly energetika infraqurylymyn rekonstrýktsiialaýǵa 8,5 mlrd teńge: atap aitqanda, Úkimet qaýlysymen rezervten shamamen 7,4 mlrd teńge, oblystyq biýdjetten 1,1 mlrd teńge bólindi. Qazandyq agregattaryn jóndeýge 5,5 mlrd teńge, taratý qurylǵysyn (ATQ) rekonstrýktsiialaýǵa 280 mln-nan astam, 19 km jylý jelilerin jańǵyrtýǵa taǵy 2,7 mlrd teńge kóleminde qarajat bólindi.
Ridder JEO-da jylytý maýsymynyń basyna qarai 2 qazandyq agregatyn iske qosý josparlanýda, qalǵandary temperatýra kestesine sáikes sýyq túsýine qarai paidalanýǵa beriletin bolady. Jumys aiaqtalǵannan keiin jylý kóziniń tozýy 40%-ǵa deiin tómendeidi.
Úkimet basshysyna jylý jelilerin jóndeý jumystary kestege sáikes júrgizilip jatqany, sondai-aq biylǵy tamyz aiynyń sońyna deiin aiaqtalatyny týraly baiandaldy. Jalpy uzyndyǵy 19 shaqyrym bolatyn 55 ýchaskege 127 adam men 20 tehnika jumyldyrylǵan. Búgingi tańda óńirdiń energetikalyq infraqurylymynyń tozýy 78,5%-ǵa jetedi. Osy kórsetkish boiynsha Ridder de «qyzyl aimaqta» ornalasqan. Jóndeý jumystary aiaqtalǵannan keiin tozý deńgeii 24,1%-ǵa tómendeidi dep kútilýde.
Premer-Ministr jylytý maýsymynyń turaqty ótýi úshin energetika infraqurylymyn jańǵyrtýdy jedeldetip aiaqtaý qajettigin atap ótti. Búgingi tańda injenerlik jeliler 58,4%-ǵa, 32 ortalyqtandyrylǵan qazandyq 51%-ǵa, gidroelektrostansalar 69%-ǵa jáne JEO 52%-ǵa daiyn.
"Bul – halyqtyń turmys-tirshiligi men qaýipsizdigin qamtamasyz etý máselesi. Sondyqtan bul jerde qatań memlekettik baqylaý – talap pen qadaǵalaý qajet. Memleket osynda jáne jalpy alǵanda elimizdegi infraqurylymdy jańǵyrtýǵa óz tarapynan qomaqty qarajat salýda. Jumys qarqynyn arttyra túsý kerek. Sýyq túskende úilerdiń jylýsyz qalýyna nemese onyń jetkiliksiz berilýine jol bermeý kerek. Sapany saqtai otyryp, bekitilgen kesteden qalyp qoimai, aldyn ala sharalar qabyldaý mańyzdy. Aldaǵy jylytý maýsymy júrgizilgen jańǵyrtý jumystarynyń sapasy men tiimdiliginiń kórsetkishi bolady", — dep atap ótti Oljas Bektenov.
Premer-Ministr Energetika ministrligine oblys ákimdigimen birlesip, atalǵan máseleni erekshe baqylaýda ustaýdy tapsyrdy.
