Almatyda Qazaqstan men Ózbekstan premer-ministrleri Oljas Bektenov pen Abdýlla Aripovtiń tóraǵalyǵymen ekijaqty yntymaqtastyq jónindegi birlesken Úkimetaralyq komissiianyń 21-otyrysy ótti.
Taraptar Ózbekstan Prezidenti Shavkat Mirziioevtiń Qazaqstanǵa resmi sapary qarsańynda ekijaqty kún tártibindegi ózekti máseleler boiynsha pikir almasty jáne eki memleket basshylarynyń ýaǵdalastyqtaryn iske asyrý qarqynyn qarastyrdy. Atap aitqanda, saýda-ekonomikalyq, investitsiialyq, sý-energetikalyq yntymaqtastyqty, kólik, ónerkásip, aýyl sharýashylyǵy, ekologiia jáne tsifrlandyrý salasyndaǵy ózara is-qimyldy nyǵaitýǵa baǵyttalǵan jobalardyń jai-kúii talqylandy.
Qazaqstan men Ózbekstanǵa Ortalyq Aziiadaǵy barlyq saýdanyń 57%-y tiesili. Ótken jyldyń qorytyndysy boiynsha eki el arasyndaǵy taýar ainalymy $4,5 mlrd qurady, 2024 jyldyń 4 aiynda onyń kólemi $1,2 mlrd-tan asty.
Ónerkásiptik kooperatsiia 14,7 myńnan astam jumys ornyn asha otyryp, $3,1 mlrd somasyna 69 jobany iske asyrýdy kózdeidi. Búgingi tańda $217 mln somasyna 12 birlesken joba sátti júzege asyrylyp, 4,5 myńǵa jýyq jumys orny ashyldy. Qazirgi ýaqytta $178 mln-ǵa 3 investitsiialyq joba iske asyrylýda. Iri jobalardyń biri – Taraz qalasyndaǵy 500 myń tonna bolat ónimin shyǵaratyn elektrometallýrgiia zaýyty.
Qazaqstannyń Túrkistan oblysy men Ózbekstannyń Syrdariia oblysynyń aýmaqtarynda aýdany 100 ga bolatyn «Ortalyq Aziia» halyqaralyq ónerkásiptik kooperatsiia ortalyǵy qurylysynyń jobasyn iske asyrý birlesken óndirister úshin qosymsha yntalandyrý jaǵdailaryn jasaýǵa múmkindik beredi.
Mashina jasaý salasynda Qazaqstan men Ózbekstan jyl saiynǵy negizde elektrotehnikalyq ónimder men akkýmýliatorlardy ózara jetkizý kólemin ulǵaitý boiynsha yntymaqtastyqty keńeitetin bolady.
Sý salasynyń eki eldiń tynys-tirshiligine áserin eskere otyryp, yntymaqtastyqty odan ári nyǵaitý quraldary pysyqtaldy. Atap aitqanda, eki memleket aýmaǵyndaǵy sý taratý ýchaskelerin tsifrlandyrý jáne avtomattandyrý boiynsha birlesken qadamdar qaraldy.
«Ózbekstan biz úshin tatý kórshi, odaqtas ári baýyrlas memleket. Bizdiń úkimetterimizdiń aldyna eki eldiń Memleket basshylary orta merzimdi perspektivada ózara taýar ainalymyn $10 mlrd deiin jetkizý boiynsha aýqymdy mindet qoidy. Bul baǵytta biz agroónerkásip kesheni men azyq-túlik ónerkásibinde saýdany ulǵaitýǵa, sondai-aq ónerkásiptik kooperatsiia deńgeiin arttyrýǵa múddelimiz», — dedi Oljas Bektenov.
Óz kezeginde Abdýlla Aripov Qazaqstan men Ózbekstan arasyndaǵy qarym-qatynas sońǵy jyldary strategiialyq áriptestik pen odaqtastyq negizde qarqyndy damyp kele jatqanyn atap ótti. Sondai-aq atalǵan qarym-qatynasty odan ári nyǵaitý úshin zor áleýet bar.
«Barlyq salada oń ósim baiqalady. Bul bizdiń baýyrlas halqymyzdyń múddelerine tolyq sai keledi. Mundai joǵary deńgeidegi áriptestiktiń mańyzdy faktory – eki memlekettiń basshylary arasyndaǵy dostyq pen senimdi qarym-qatynas ekeni sózsiz. Búgingi kezdesý men qol jetkizilgen ýaǵdalastyqtar bizdiń yntymaqtastyǵymyzǵa qosymsha serpin beretinine senimdimin», — dedi Abdýlla Aripov.
Anyqtama: Qazaqstan men Ózbekstannyń taýar ainalymy 5 jylda 29,5%-ǵa ósip, $4,4 mlrd qurady. Otandyq taýarlardyń eksporty 56,9%-ǵa – $2 mlrd-tan $3,1 mlrd-qa deiin ósti. Osy kezeńde import 9,1%-ǵa azaiyp, 2023 jyly $1,3 mlrd qurady.
