Qazaqstan Premer-Ministri Oljas Bektenov 19 qańtar men 1 aqpan aralyǵynda Kanvondoda (Koreia Respýblikasy) ótken IV qysqy jasóspirimder Olimpiadasynyń jeńimpazdary men júldegerlerine Memleket basshysynyń atynan alǵys hattar tabys etti, dep habarlaidy Dalanews.kz.
Úkimet basshysy QR Prezidenti Qasym-Jomart Toqaevtyń alǵys hatyn oqyp berip, sportshylardy qol jetkizgen nátijelerimen quttyqtady. Premer-Ministr bul Qazaqstannyń jastar arasyndaǵy qysqy Olimpiada oiyndary tarihyndaǵy alǵashqy altyny ekenin atap ótti. Jalpy medal sany boiynsha Qazaqstan álemniń 78 eli arasynda 20-shy oryndy ielendi.
"Sport – eldiń mártebesin biiktetip, memlekettiń qýaty men ósip kele jatqan áleýetine degen adamdardyń senimin nyǵaita túsetin mańyzdy faktor. Qazaqstandyqtar Sizderdiń jeńisterińizdi maqtan tutady. Ózderińiz siiaqty erik-jigeri myqty jas sportshylardyń elimizdiń bolashaǵy ekenine kámil senemin. Jeńis jolynda qoldaý kórsetken tálimgerler men jattyqtyrýshylar erekshe alǵysqa laiyq. Búgingi baǵyndyrǵan biik belester aldaǵy olimpiadalardaǵy jetistikterdiń bastaýy deýge bolady", — dedi Oljas Bektenov.
Shańǵymen tuǵyrdan sekirý boiynsha IV qysqy jasóspirimder Olimpiadasynyń jeńimpazy Ilia Mizernyh pen onyń jattyqtyrýshysy Qairat Biekenovke alǵys hattar tabys etildi.
Sonymen qatar shaibaly hokkei boiynsha qola júlde oljalaǵan Arsenii Kýchkovskii, Nikita Kýlakov, Temirlan Aiboluly, Matvei Reshetko, Rasýl Tursynov, Jahanger Tileýhan, Tair Bigarinov, Egor Kravchenko, Roman Michýrov, Ádilhan Sattar, Ánýar Ahmetjanov jáne komandany jattyqtyrýshy Ramazan Qaidarovtyń da eńbekteri atalyp ótildi.
Oiyndar jeńimpazy Ilia Mizernyh barlyq sportshynyń atynan alǵys bildirip, daiyndyq kezinde quramanyń jattyqtyrýshylar qoiǵan mindetterdi barlyq kúsh-jigerin salyp oryndaǵanyn aitty.
"Altyn medal – meniń ǵana jeńisim emes, bul búkil komanda men jattyqtyrýshylar quramynyń jumysynyń nátijesi. Elimizdiń Prezidenti Qasym-Jomart Kemeluly Toqaevtyń quttyqtaýyn estip, tóbem kókke jetkendei boldy. Ol maǵan jáne basqa qazaqstandyq sportshylarǵa da jańa jeńister tiledi. Bul bizdi odan ári shabyttandyra túsedi. Shalǵaida júrsek te, biz úlken qoldaýdy sezindik, bul – bizdiń ortaq jeńisimiz! Alǵa, Qazaqstan!", — dedi ol.
