Premer-Mınıstr Oljas Bektenov Memleket basshysynyń Joldaýy Úkimet pen búkil qazaqstandyq qoǵam úshin strategıalyq baǵdar bolyp tabylatynyn atap ótti, - dep habarlaıdy Dalanews.kz.
"Joldaý bizge taıaý merzimge arnalǵan maqsat-mindettermen qatar nysanaly kórsetkishteri jáne ındıkatorlary belgİlengen naqty is-qımyl algorıtmin aıqyndap berdi. Árbir tarmaqtyń oryndalýy qatań baqylaýda bolady. Bul rette qorytyndy nátıjege, onyń ekonomıkaǵa tıimdiligine basa nazar aýdarylady. Azamattardyń tabys deńgeıin arttyrý Úkimet jumysynyń ózgermeıtin basty maqsaty. Kásipkerlikti damytý, halyqty jumyspen qamtý úshin qolaıly jaǵdaılar jasaý jáne memlekettik búdjetti utymdy bólý aıtarlyqtaı ekonomıkalyq órleýge qol jetkizýge múmkindik beredi. Bul rette Memleket basshysy atap ótkendeı, "ekonomıka ósken saıyn áleýmettik teńsizdik azaıyp, orta tap kúsheıe túsýi kerek", - dep atap ótti Oljas Bektenov.
Memleket basshysy ekonomıkanyń naqty sektoryn damytýǵa erekshe kóńil bóldi. Bul ónerkásip, energetıka, gaz salasy, kólik kesheni, ekologıa jáne sıfrlandyrý máseleleri. Prezıdenttiń tapsyrmalaryn iske asyrý úshin Premer-Mınıstr ekonomıkanyń naqty sektory boıynsha birqatar naqty mindetterdi belgiledi.
"Memleket basshysy tereń óńdeý klasterlerin qurý jónindegi árbir iri joba boıynsha óz shıkizatymyz ben qural-jabdyqtarymyzdy barynsha paıdalaný mańyzdy ekenin atap ótti. Osyǵan baılanysty ekonomıka mınıstrligi salalyq memlekettik organdarmen birlesip, otandyq óndirýshilerdi qoldaý máselelerin neǵurlym belsendi ilgeriletýdi jáne sabaqtas óndiristerdi qura otyryp, klasterlik júıeni damytýdy eskere otyryp, árbir jobany iske asyrýdyń naqty josparyn jańartýy qajet. Avtomobıl ónerkásibi boıynsha Ónerkásip mınıstrligine óndiristerdi lokalızasıalaý deńgeıin belsendi arttyrýdy tapsyramyn", - dep atap ótti Oljas Bektenov.
Elimizdi gazben qamtý máselesi boıynsha gaz resýrstaryn utymdy bólýge basty nazar aýdarylýy tıis. Osyǵan baılanysty Úkimet basshysy taldaý júrgizý jáne qandaı energıa obektileri gazǵa aýystyrylatynyn aıqyndaý qajettigin atap ótti.
Jańa gaz óńdeý qýattaryn salý úshin Energetıka mınıstrligine ınvestısıalyq sheshimder qabyldaýdy jedeldetý tapsyryldy. Eldiń energetıkalyq qaýipsizdigin qamtamasyz etý jónindegi mindetterdi oryndaý úshin qarjylyq damý ınstıtýttarymen birlesip 1 qarashaǵa deıin jańa generasıa obektileriniń qurylysyna uzaq merzimdi kredıt berý tetikterin ázirleý qajet.
Sondaı-aq Energetıka mınıstrligi múddeli memlekettik organdarmen birlesip 6 qazanda respýblıkalyq referendýmdy uıymdastyrý jáne sapaly ótkizý jóninde sharalar qabyldaýy qajet.
Ulttyq ekonomıka mınıstrligine múddeli memlekettik organdarmen birlesip bıylǵy 1 qarashaǵa deıin Úkimetke Energetıkalyq jáne komýnaldyq ınfraqurylymdy jańǵyrtý jónindegi ulttyq jobany bekitý jónindegi qaýly jobasyn engizý tapsyryldy.
"Memleket basshysy kelesi jyldan bastap naqty tutyný normalaryn engizý qajettigin atap ótti. Sondyqtan adamdardy resýrstardy utymdy paıdalanýǵa yntalandyrý kerek. Ulttyq ekonomıka mınıstrligi bıylǵy jyldyń sońyna deıin tabıǵı monopolıalar salalarynda rettelip kórsetiletin komýnaldyq qyzmetterdi tutyný mólsherine qaraı tutyný normalaryn engizsin", - dep tapsyrdy Oljas Bektenov.
Premer-Mınıstr kólik-logıstıka sektorynyń máselelerine nazar aýdaryp, kólik ınfraqurylymyn qoldaý men damytý úlken ınvestısıalardy tartýdy talap etetinin eskertti. Osyndaı sharalardyń biri – "Qazaqstan temir joly" kórsetetin qyzmetterdiń tarıfterin qaıta qaraý. Soǵan oraı, "Samuryq-Qazyna" qory Kólik mınıstrligimen birge júkterdi temirjol kóligimen tasymaldaýdyń jańa tarıftik saıasatyn ázirleýi qajet.
Oblysaralyq jáne aýdanaralyq baǵyttardaǵy joldardy ortasha jóndeýdi qamtýdy ulǵaıtý úshin kólik mınıstrligine osy jyldyń 1 jeltoqsanyna deıin naqty jobalardy, kórsetkishterdi jáne qarjylandyrý kózderin aıqyndaı otyryp, egjeı-tegjeıli jospar ázirleý tapsyryldy. Qarajattyń maqsatqa saı jumsalýyn baqylaýdyń bári jáne osy jumystardyń monıtorıńi Biryńǵaı sıfrlyq platforma arqyly júrgizilýge tıis.
Budan basqa, Kólik mınıstrligine Ónerkásip mınıstrligimen jáne "Báıterek" holdıńimen birlesip shaǵyn áýe kemelerin satyp alý tetikterin pysyqtaý tapsyryldy.
