Oljas Bektenov Memleket basshysy Qasym-Jomart Toqaevtyń Ulttyq quryltaidyń 5‑shi otyrysynda aitqan saiasi reformalardy jalǵastyrýǵa arnalǵan bastamalaryn qoldaitynyn jáne olardy iske asyrýda naqty nátijeler qajet ekenin atap ótti, dep habarlaidy Dalanews.kz.
«Qurmetti áriptester! Keshe ótken Ulttyq quryltaidyń 5‑shi otyrysynda Memleket basshysy Qasym-Jomart Kemeluly Toqaev buǵan deiingi aýqymdy saiasi reformalarynyń jalǵasy bolyp tabylatyn bastamalaryn jariia etti.
Memleket basshysy Parlament pen qoǵamdyq institýttardyń rólin kúsheitý arqyly elimizdiń demokratiialyq júiesin ári qarai damytýǵa baǵyttalǵan mańyzdy tapsyrmalar berdi. Bul bastamalar qoǵamdaǵy ádildik, otanshyldyq jáne «Zań men Tártip» qaǵidattaryn odan ári nyǵaitýǵa yqpal etedi», – dedi Premer-ministr.
Oljas Bektenov sonymen qatar, árbir ministr men ákimge batyl ári innovatsiialyq sheshimder qabyldaý qajettigine erekshe nazar aýdardy.
«Jaýapty laýazymdy tulǵalar tek jospar quryp qana qoimai, óz salasynda naqty, kózge kórinetin nátijeler kórsetýi tiis. Bul talap ómirdiń barlyq salasyna qatysty», – dedi ol.
Premer-ministrtiń aitýynsha, «Taza Qazaqstan» jobasy jáne ekonomikalyq damý baǵdarlamalary da óńirlerde júieli túrde júzege asyrylýy kerek. Osy arqyly halyqtyń ómir súrý sapasyn jaqsartý jáne Qazaqstannyń turaqty damý maqsattaryna qol jetkizý qamtamasyz etiledi.
