Úkimet basshysy Oljas Bektenov Ulytaý oblysyna jumys sapary barysynda óńirdiń ónerkásiptik áleýetimen tanysty. Premer-Ministr Jylandy kenishinde bolyp, sala qyzmetkerlerin kele jatqan kásibi merekeleri – Shahter kúnimen quttyqtady, olarǵa Prezident atynan memlekettik marapattardy tabys etti, – dep habarlaidy Dalanews.kz.
Premer-Ministr Oljas Bektenov «Qazaqmys korporatsiiasy» JShS basqarma tóraǵasy Nurahmet Nurievtiń kompaniianyń aǵymdaǵy qyzmeti, investitsiialyq baǵdarlamalary, damý josparlary, áleýmettik jobalary men el ishindegi qundylyqty damytý boiynsha atqarylyp jatqan jumystary týraly baiandamasyn tyńdady.
Biylǵy 6 aida Korporatsiia Ulytaý oblysyndaǵy jetkizýshilerden 92,7 mlrd teńgege taýarlar, jumystar men qyzmetter (TJQ) satyp aldy, óńirdegi óndirýshilerden TJQ satyp alý úlesi 35,5%-dy qurady. Jergilikti kásiporyndarmen 27,8 mlrd teńgege ofteik kelisimsharttar jasaldy. «Qazaqmys» ishki qundylyǵynyń jalpy úlesi biyl 71,7%-dy qurady. Respýblikalyq jáne jergilikti biýdjetke túsetin túsimder birneshe esege ósti.
Oblys ónerkásiptiń ótken jylǵy kórsetkishterimen salystyrǵanda 7% ósimmen elimizde 4-orynda tur. Premer-Ministr qarqyndy tómendetpeýdi tapsyrdy jáne odan ári ósý úshin qolda bar rezervterge nazar aýdardy.
– Memleket basshysy Qazaqstan halqyna Joldaýynda elimizdiń taý-ken metallýrgiia keshenin damytýdyń mańyzdy ekenin basa aitty. Jekemenshik kásiporyndardy geologiialyq barlaýǵa investitsiia salýǵa yntalandyrý – basym mindetter qatarynda. Óńdeý ónerkásipterin shikizatpen qamtamasyz etý kólemin ulǵaitý úshin barlyq kúsh-jigerdi jumsaýymyz qajet. Bizdiń aldymyzda jańa tehnologiialardy engizý, jergilikti qamtýdy arttyrý jáne eksportty damytý arqyly óndiristiń básekege qabilettiligin arttyrý mindeti tur. Salany odan ári damytý bizdiń óndirýshilerdiń jahandyq trendter usynyp otyrǵan tehnologiialyq ózgeristerge tez beiimdele alýy men múmkindikti barynsha paidalana alýyna tikelei bailanysty, – degen Oljas Bektenov bul baǵytta memlekettik organdar men biznes úilesimdi jumys isteýi qajet ekenin basa aitty.
«Qurmet» ordenimen «Qazaqmys korporatsiiasy» JShS filialynyń ardagerler keńesiniń tóraǵasy Dáýlet Aiqymbaev marapattaldy. II dárejeli «Eńbek Dańqy» ordeni taý-ken jumysshysy Áliasqar Aimanovqa, III dárejeli «Eńbek Dańqy» ordeni ýchaske sheberleri Qanat Isabek pen Baýyrjan Qopabaevqa, «Eren eńbegi úshin» medali – burǵylaýshynyń kómekshisi Daniiar Akkikelovke, operator Raýshan Qalmyrzinaǵa, úńgileýshi Bekmuhan Qaldarovqa, ýchaske bastyǵynyń orynbasary Aqbeisen Qaiyrbekovke, burǵylaýshy Kentai Orazbekovke, mashinist Beisen Ábilmajinge, jetekshi mehanik Boris Polikarpovqa jáne Jezqazǵan baiytý fabrikalarynyń óndiris direktory Arystanbek Ábdiqaiyrovqa tabystaldy.
