“Tomiris” esimimen tanylǵan emshi Gúlsara Sýazqyzy Jambyl oblysy Turar Rysqulov aýdany Tereńózek aýylynyń turǵyndarynan keshirim surady, dep habarlaidy Dalanews.kz.
Jaqynda áleýmettik jelide Tomiris patshaiymnyń kiimin kigen emshiniń mektepke barǵan videosy tarap, kópshiliktiń qyzý talqysyna tústi. Jurt ony jerden alyp, jerge saldy. Kóptiń synyna ilikken Sýazqyzy óz shyndyǵyn “Kóremiz” baǵdarlamasynda baiandap berdi.
“Jaman bolsyn, jaqsy bolsyn - ol meniń týǵan jerim. Ol jaqtaǵy adamdardyń qai-qaisyn bolsa da jaqsy kóremin. Kishkene túsinbestik boldy. Olar qatelik jasap qoidy. Biraq men keshirdim. Men de áreketimniń durys-burystyǵyn bilmeimin. Alaida men adalmyn. Ózimniń atymnan olardan da keshirim suraimyn”, - dedi ol.
Aitýynsha, ol halyqqa birneshe jyldan beri qyzmet kórsetip keledi.
“Dáriger bolyp jumys isteimin. Jumysym aýyr. Ár dáriger ózinshe emdep jatady. Al men meditsinalyq preparattarmen birge emshilik jumysty ushtastyra atqaramyn. Adam jazylmai jatsa, Quran súrelerin qosamyn. Ózimniń denemde qasietim bar, ony da qosamyn. Jazylmaityn aýrý joq”, - deidi ol.
Emshi emdeý barysynda kelgen naýqastardan aqsha suramaitynyn aitty.
“Meniń denemdegi qasiet basqa adamdarda joq. Qandai qasiet ekenin aita almaimyn. Sózben jetkize almaimyn. Adamnyń boiyndaǵy dertti aita alamyn. Adamdardan aqsha suramaimyn, olar qansha beredi, sony alamyn. Kóripkeldik qasietim de bar. Máselen, qabyldaýyma keletin adamdardy aldyn ala túsimde kóremin. Olardyń jazylatyny ne jazylmaityny týraly aian túsedi. Sondai-aq adamnyń qansha aqshasy bar ekeninen habardar bolyp otyramyn”, - deidi Gúlsara Saýasqyzy “Kóremiz” baǵdarlamasynda.
Negizgi oqiǵanyń mán-jaiyn túsindirgen emshi Tomiristen de arnaiy aian túskenin málim etti. Onyń sózinshe, mektepke qaiyrymdylyq jasaý úshin biraz shyǵyndalǵan.
"Túsime Tomiristen aian keldi. “Meniń jumysymdy sen jalǵastyrasyń, klinikańdy joǵaltyp alma” dep kóp jyl boiy aian berdi. Óziniń kostiýmin maǵan berdi. Qyzyl kostiýmdi ózi kórsetti, men ony tiktirdim. Meniń 37 obrazdy kostiýmim bar. Osy mektepke barý úshin bas-aiaǵy 4,5 mln teńge aqsham ketti. Eshkimge bergen joqpyn, jol boiy jarattym. Qurbandyqqa, dastarhanǵa berip otyrdym. Men mektepke qur qol barmadym. Dúkennen kiim, kamera, kompiýter aldym. Mádeniet ortalyǵyna berdim. Mektepke kiim berip, jaǵdaiy tómen otbasylarǵa taratyńyzdar dedim.
Kúz ben qysqa arnalǵan kiim aldym, onyń ishinde bala men eresekterge arnalǵan kiimge 900 myń teńge ketti. 750 myń teńgege alynǵan kiimdi mektepke tastadym. Olardyń sapasyna qaraýǵa ýaqytym bolmady. Ol jerdegi adamdar kiimniń sapasyn sókse, áielder ózderine jaqsysyn qaldyryp, aýystyryp qoiýy múmkin. Biz mektepte 15 minýt qana otyrdyq. Mektep direktory shai ish dep, maǵan 4 myń teńgeniń shokoladyn berdi”, - deidi ol.
Buǵan deiin Saýasqyzynyń shańyraǵynda dini rásim ótkizilip, dini qyzmet pen dini birlestikteri týraly zańdy buzǵany úshin 50 AEK (ol kezde 106 000 teńge) kóleminde ákimshilik aiyppul arqalaǵany belgili boldy. Alaida emshi bul aqparatty joqqa shyǵardy.
Eske salaiyq, Jambyl oblysyndaǵy mektepke baqsynyń kelýine bailanysty birneshe jaýapty adam qyzmetinen bosatylǵany týraly jazǵan edik.
Oqiǵa Turar Rysqulov aýdanyndaǵy Tereńózek aýylynda bolǵan.
Tekserýdi Jambyl oblysynyń bala quqyqtaryn qorǵaý jónindegi ýákili, Jambyl oblysynyń bilim berý salasyndaǵy sapany qamtamasyz etý departamentiniń qyzmetkerleri júrgizdi.
Oqiǵa ornynda bilim berý, aqparat jáne qoǵamdyq damý basqarmalarynyń qyzmetkerleri jumys istedi.
Tekserý nátijesinde Turar Rysqulov aýdany ákiminiń orynbasary A.Terlikbaev, Jambyl atyndaǵy mektep direktora E.Zakimbaeva óz erkimen qyzmetinen ketti.
Turar Rysulov aýdanynyń ishki saiasat bóliminiń basshysyna jáne Tereńózek aýylynyń ákimine qatań sógis túrinde tártiptik jaza qoldanyldy.
