“توميريس” ەسىمىمەن تانىلعان ەمشى گۇلسارا سۋاز قىزى جامبىل وبلىسى تۇرار رىسقۇلوۆ اۋدانى تەرەڭوزەك اۋىلىنىڭ تۇرعىندارىنان كەشىرىم سۇرادى، دەپ حابارلايدى Dalanews.kz.
جاقىندا الەۋمەتتىك جەلىدە توميريس پاتشايىمنىڭ كيىمىن كيگەن ەمشىنىڭ مەكتەپكە بارعان ۆيدەوسى تاراپ، كوپشىلىكتىڭ قىزۋ تالقىسىنا ءتۇستى. جۇرت ونى جەردەن الىپ، جەرگە سالدى. كوپتىڭ سىنىنا ىلىككەن سۋاز قىزى ءوز شىندىعىن “كورەمىز” باعدارلاماسىندا بايانداپ بەردى.
“جامان بولسىن، جاقسى بولسىن - ول مەنىڭ تۋعان جەرىم. ول جاقتاعى ادامداردىڭ قاي-قايسىن بولسا دا جاقسى كورەمىن. كىشكەنە تۇسىنبەستىك بولدى. ولار قاتەلىك جاساپ قويدى. ءبىراق مەن كەشىردىم. مەن دە ارەكەتىمنىڭ دۇرىس-بۇرىستىعىن بىلمەيمىن. الايدا مەن ادالمىن. ءوزىمنىڭ اتىمنان ولاردان دا كەشىرىم سۇرايمىن”، - دەدى ول.
ايتۋىنشا، ول حالىققا بىرنەشە جىلدان بەرى قىزمەت كورسەتىپ كەلەدى.
“دارىگەر بولىپ جۇمىس ىستەيمىن. جۇمىسىم اۋىر. ءار دارىگەر وزىنشە ەمدەپ جاتادى. ال مەن مەديسينالىق پرەپاراتتارمەن بىرگە ەمشىلىك جۇمىستى ۇشتاستىرا اتقارامىن. ادام جازىلماي جاتسا، قۇران سۇرەلەرىن قوسامىن. ءوزىمنىڭ دەنەمدە قاسيەتىم بار، ونى دا قوسامىن. جازىلمايتىن اۋرۋ جوق”، - دەيدى ول.
ەمشى ەمدەۋ بارىسىندا كەلگەن ناۋقاستاردان اقشا سۇرامايتىنىن ايتتى.
“مەنىڭ دەنەمدەگى قاسيەت باسقا ادامداردا جوق. قانداي قاسيەت ەكەنىن ايتا المايمىن. سوزبەن جەتكىزە المايمىن. ادامنىڭ بويىنداعى دەرتتى ايتا الامىن. ادامداردان اقشا سۇرامايمىن، ولار قانشا بەرەدى، سونى الامىن. كورىپكەلدىك قاسيەتىم دە بار. ماسەلەن، قابىلداۋىما كەلەتىن ادامداردى الدىن الا تۇسىمدە كورەمىن. ولاردىڭ جازىلاتىنى نە جازىلمايتىنى تۋرالى ايان تۇسەدى. سونداي-اق ادامنىڭ قانشا اقشاسى بار ەكەنىنەن حاباردار بولىپ وتىرامىن”، - دەيدى گۇلسارا ساۋاس قىزى “كورەمىز” باعدارلاماسىندا.
نەگىزگى وقيعانىڭ ءمان-جايىن تۇسىندىرگەن ەمشى توميريستەن دە ارنايى ايان تۇسكەنىن ءمالىم ەتتى. ونىڭ سوزىنشە، مەكتەپكە قايىرىمدىلىق جاساۋ ءۇشىن ءبىراز شىعىندالعان.
"تۇسىمە توميريستەن ايان كەلدى. “مەنىڭ جۇمىسىمدى سەن جالعاستىراسىڭ، كلينيكاڭدى جوعالتىپ الما” دەپ كوپ جىل بويى ايان بەردى. ءوزىنىڭ كوستيۋمىن ماعان بەردى. قىزىل كوستيۋمدى ءوزى كورسەتتى، مەن ونى تىكتىردىم. مەنىڭ 37 وبرازدى كوستيۋمىم بار. وسى مەكتەپكە بارۋ ءۇشىن باس-اياعى 4،5 ملن تەڭگە اقشام كەتتى. ەشكىمگە بەرگەن جوقپىن، جول بويى جاراتتىم. قۇرباندىققا، داستارحانعا بەرىپ وتىردىم. مەن مەكتەپكە قۇر قول بارمادىم. دۇكەننەن كيىم، كامەرا، كومپيۋتەر الدىم. مادەنيەت ورتالىعىنا بەردىم. مەكتەپكە كيىم بەرىپ، جاعدايى تومەن وتباسىلارعا تاراتىڭىزدار دەدىم.
كۇز بەن قىسقا ارنالعان كيىم الدىم، ونىڭ ىشىندە بالا مەن ەرەسەكتەرگە ارنالعان كيىمگە 900 مىڭ تەڭگە كەتتى. 750 مىڭ تەڭگەگە الىنعان كيىمدى مەكتەپكە تاستادىم. ولاردىڭ ساپاسىنا قاراۋعا ۋاقىتىم بولمادى. ول جەردەگى ادامدار كيىمنىڭ ساپاسىن سوكسە، ايەلدەر وزدەرىنە جاقسىسىن قالدىرىپ، اۋىستىرىپ قويۋى مۇمكىن. ءبىز مەكتەپتە 15 مينۋت قانا وتىردىق. مەكتەپ ديرەكتورى شاي ءىش دەپ، ماعان 4 مىڭ تەڭگەنىڭ شوكولادىن بەردى”، - دەيدى ول.
بۇعان دەيىن ساۋاس قىزىنىڭ شاڭىراعىندا ءدىني ءراسىم وتكىزىلىپ، ءدىني قىزمەت پەن ءدىني بىرلەستىكتەرى تۋرالى زاڭدى بۇزعانى ءۇشىن 50 اەك (ول كەزدە 106 000 تەڭگە) كولەمىندە اكىمشىلىك ايىپپۇل ارقالاعانى بەلگىلى بولدى. الايدا ەمشى بۇل اقپاراتتى جوققا شىعاردى.
ەسكە سالايىق، جامبىل وبلىسىنداعى مەكتەپكە باقسىنىڭ كەلۋىنە بايلانىستى بىرنەشە جاۋاپتى ادام قىزمەتىنەن بوساتىلعانى تۋرالى جازعان ەدىك.
وقيعا تۇرار رىسقۇلوۆ اۋدانىنداعى تەرەڭوزەك اۋىلىندا بولعان.
تەكسەرۋدى جامبىل وبلىسىنىڭ بالا قۇقىقتارىن قورعاۋ جونىندەگى ۋاكىلى، جامبىل وبلىسىنىڭ ءبىلىم بەرۋ سالاسىنداعى ساپانى قامتاماسىز ەتۋ دەپارتامەنتىنىڭ قىزمەتكەرلەرى جۇرگىزدى.
وقيعا ورنىندا ءبىلىم بەرۋ، اقپارات جانە قوعامدىق دامۋ باسقارمالارىنىڭ قىزمەتكەرلەرى جۇمىس ىستەدى.
تەكسەرۋ ناتيجەسىندە تۇرار رىسقۇلوۆ اۋدانى اكىمىنىڭ ورىنباسارى ا.تەرلىكبايەۆ، جامبىل اتىنداعى مەكتەپ ديرەكتورا ە.زاكيمبايەۆا ءوز ەركىمەن قىزمەتىنەن كەتتى.
تۇرار رىسۇلوۆ اۋدانىنىڭ ىشكى ساياسات ءبولىمىنىڭ باسشىسىنا جانە تەرەڭوزەك اۋىلىنىڭ اكىمىنە قاتاڭ سوگىس تۇرىندە تارتىپتىك جازا قولدانىلدى.
