Qazaqstannyń aqparattyq keńistigin bilep-tóstep otyrǵan reseilik mass-media til janashyrlaryn orystildi aýditoriiaǵa qarsy qoiý naýqanyn qyzý júrgizýde.
Til janashyrlaryn qaralaý kampaniiasy Abaevtyń atyshýly málimdemesinen keiin údei túspese, báseńdegen joq.
Qazaqstanda “Til maidany” atty qozǵalystyń qurylýy odaqtasymyzǵa unamai, aqyr sońy osy uiymnyń bastaýynda turǵan Qýat Ahmetov elden ketýge májbúr bolǵan.
YouTube-tegi “Til maidany” arnasy arqyly memlekettiń tildi dárejesin kemitken mekemeler men jekelegen tulǵalardy jurtqa jariia etip, olardy osy qylyǵy úshin el aldynda keshirim suratqan Ahmetovtyń áreketi Kreml ideologtarynyń qulaǵyna shalynyp, munyń sońy úlken daý-damaiǵa ulasqan.
Ahmetovtyń aýditoriiasy kún ótken saiyn artyp jatqany da Máskeýdiń mazasyn qashyrsa kerek, Qýatty qýdalaýdy surap, Aq Ordaǵa salmaq salǵan.
Kremldiń propaganda quraldary kúni keshe Qazaqstannan belgisiz baǵytqa ushyp ketken “Til maidany" belsendisiniń qaida jasyrynǵanyna deiin bilip otyr.
Máselen, “Moskovskii komsomolets” bylai jazady:
“Ahmetov? Ol Qazaqstandaǵy orystildi aýditoriiany ábden zárezap qaldy. Qazaqsha sóilemegeni úshin talai adamdy alqymnan alyp, qoqan-loqy kórsetkenin Qýattan jábir kórgen jurt umyta qoiǵan joq. Keiin olardyń músápir keipin jelige júktep otyrǵan. Abaqtyǵa qamalarynan qoryqqan Ahmetov Qazaqstannan qashyp, Grýziiada boi tasalady. Qazir ol Tbiliside júr”.
Al Russia Today bóten eldiń biliginen Ahmetovtyń qolyna kisen salýdy talap etýde.
“Qazaqstandaǵy ultarazdyqty qozdyryp, orys aýditoriiasynyń júikesin juqartqan Ahmetovty bir saǵatqa jeter-jetpes ýaqytta bosata saldy. Qolyna kisen salynǵan sátte abaqtyǵa qamaýdyń ornyna, aiyppulmen shekteldi. Bizdiń valiýtaǵa shaqqanda bar bolǵany 25 myń rýbl. Ahmetovtyń jaqtastary álgi aiyppuldy áp-sátte jaýyp tastady. Qazaq biligi odan zardap shekken turǵyndarmen nege tildespeidi?” , – dep bulqan-talqan bolǵan eken RT.
Aita ketelik, buǵan deiin Dalanews.kz “Til maidanynyń” qurbany boldym degen atyraýlyq áieldiń suhbatyn jariialaǵan.
Emiliia Grechanik oryssha sóilegeni úshin sorlaǵanyn, qazaq ultshyldarynan qaimyqqandyqtan kameranyń aldynda keshirim suraýǵa májbúr bolǵanyn, bul áreketke amalsyzdan barǵanyn aitqan.
Russia Today-dyń aitaǵyna ergen áiel ultshyldardyń ústinen prezident Qasym-Jomart Toqaev pen kúshtik qurylymdarǵa aryz jazýǵa oqtalyp otyr.
https://dalanews.kz/del-qazir/66889-keshirim-suramauym-kerek-edi-atyraul
