Túrkistan oblysynyń ákimi Darhan Catybaldy Kentaý qalasyndaǵy №5 Jylý energıa ortalyǵynda bolyp, jaı-kúıimen tanysyp, merdigerlermen, ortalyq basshysymen pikir almasty. Kezdesýde taraptardyń usynystaryn tyńdady. Jaýapty basqarma men qala ákimine jylytý maýsymyna daıyndyqty pysyqtaýdy tapsyrdy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

– Jylý energıa ortalyǵynyń máselesi oblystyq, úkimettik deńgeıde kóterilip, bıyl tıisti qoldaý kórsetilip jatyr. Qurylysqa kedergi keltiretin máseleler bolsa, tyńdaýǵa daıynbyz. Kúrdeli jóndeý, qazandyqtaryn aýystyrý jumystary óte sapaly atqarylýy tıis, – dedi Darhan Satybaldy.

Búginde Kentaýdaǵy jylý ortalyǵynda kúrdeli jóndeý jumystary qolǵa alynǵan. Qaladaǵy tozyǵy jetken 6,6 shaqyrym magıstraldyq jylý júıelerin jáne 4 keri sorǵy stansıasyn qaıta qurý jumystaryn atqarý boıynsha merdiger mekeme «Er-Mad» JSHS-men kelisimshart túzilip, qazirgi tańda qurylys jumystary júrgizilýde.

2023 jyly 4,7 shaqyrym jylý júıesin jáne 2 sorǵy stansıasyn qaıta qurý josparlanýda. №5 JEO-nyń qazandyqtaryn, jylý júıelerin jáne qosalqy qondyrǵylaryn qaıta qurý jumystary bastalady.

Bıyl 2 qazandyqty jylytý maýsymyna deıin qaıta qurý, 2 qazandyqty jyl sońyna deıin qaıta qurý jáne 4 qazandyqty aǵymdaǵy jóndeýden ótkizý josparlanǵan. Sonymen qatar keleshekte jylý energıa ortalyǵyn gazǵa aýystyrý kózdelgen. Osyǵan oraı jetkizýshi gaz qubyrynyń qurylysyna JSQ ázirlenip, memlekettik saraptama qorytyńdysy alyndy. Jalpy, bıyl Kentaýda jylytý maýsymyna daıyndyq erekshe ári sapaly júrgizilmek.