«Biz úshin uıymymyz aıasyndaǵy praktıkalyq yntymaqtastyqty ilgeriletý boıynsha múmkindigi zor qadamdardy ázirleý mańyzdy. Halyqaralyq jáne óńirlik máseleler boıynsha pikir almasý da paıdaly bolady. Osydan 12 jyly buryn dál osy Astanada eki elge, Úndistan men Pákistanǵa uıymymyzdyń baıqaýshysy mártebesin berý týraly sheshimge qol qoıylýynyń sımvoldyq máni bar. Bizdiń otyrysymyzdyń mańyzdylyǵy uıymyzǵa bul elder kirgeli otyr, uıymymyz keńeıýde. Endigi ýaqytta SHYU-nyń jaýapkershilik aımaǵy úsh mıllıardtan astam adam turatyn aýmaqty, álemniń jalpy ishki óniminiń shamamen úshten birin qamtıtyn bolady. Osylaısha, uıym óziniń ınstıtýttyq damýynyń «Shanhaı segizdigi» retindegi jańa kezeńine aıaq basty», - dedi Nursultan Nazarbaev.
Memleket basshysy búginde SHYU-ǵa irgeles birqatar óńirdegi jaǵdaıdyń ýshyǵýyna, geosaıası shıelenistiń artýyna kýá bolyp otyrǵanymyzdy atap ótti. «Osyǵan baılanysty bizdiń keńesimizdiń SHYU-ǵa múshe memleketter basshylarynyń halyqaralyq terorızmge birlese qarsy turý týraly málimdemesin qabyldaý bastamasy der kezinde kóterilgen qadam bolmaq. Búgin biz qol qoımaq bolyp otyrǵan ekstremızge qarsy is-jımyl jónindegi SHYU konvensıasynyń da ózektiligin atap ótkim keledi. Bizdiń elderimizdiń qorǵanys vedomstvolarynyń tıimdi ózara is-qımylyn arttyrýǵa, praktıkalyq yntymaqtastyǵyn nyǵaıtýǵa «Beıbit mısıa» terorızmge qarsy birlesken oqý-jattyǵýy aıtarlyqtaı úles qosady», - dedi Elbasy.
Qazaqstan Prezıdenti ótken kezeń ishinde SHYU túrli halyqaralyq birlestiktermen yntymaqtastyqty nyǵaıtý boıynsha da zor jumystar júrgizgenin aıtty.
«2016 jyldyń qarashasynda BUU Bas assambleıasynyń SHYU-men yntymaqtastyq jónindegi qarary qabyldandy. SHYU men BUU-nyń transulttyq esirtki qylmysyna qarsy kúres máseleleri jónindegi joǵary deńgeıdegi birlesken is-sharalarynyń qorytyndysyn qoldaımyz. SHYU men Qyzyl kres halyqaralyq komıteti qarym-qatynasyn rásimdeýdiń keleshegi zor kórinedi. Sonymen qatar SHYU-nyń EAEO-men, IYU-men ózara is-qımylyn jolǵa qoıýǵa qoldaý bildiremiz. Bul jaıynda búgin memleket basshylary shaǵyn quramdaǵy otyrysta aıtty», - dedi Nursultan Nazarbaev.
Aıta keteıik, keńeıtilgen quramdaǵy otyrysqa QR Prezıdenti Nursultan Nazarbaev, QHR Tóraǵasy Sı Szınpın, Ózbekstan Prezıdenti Shavkat Mırzıeev, Qyrǵyzstan Prezıdenti Almazbek Atambaev, Reseı Prezıdenti Vladımır Pýtın, Tájikstan Prezıdenti Emomalı Rahmon, SHYU baıqaýshy memleketteriniń basshylary: Aýǵanstan Prezıdenti Ashraf Ganı Ahmadzaı, Mońǵolıa Prezıdenti Sahıagıın Elbegdorj, Belarýs Prezıdenti Aleksandr Lýkashenko men Iran Islam Respýblıkasy Syrtqy ister mınıstriniń orynbasary Ibragım Rahımpýrdyń, Úndistan Premer-Mınıstri Narendra Modı men Pákistan Islam Respýblıkasynyń Premer-Mınıstri Mýhamad Navaz Sharıf, SHYU bas hatshysy Rashıd Alımov, SHYU Óńirlik lańkestikke qarsy qurylymy atqarýshy komıtetiniń dırektory Evgenıı Sysoev, BUU Bas hatshysy Antonıý Gýtterısh, Azıadaǵy ózara yqpaldastyq jáne senim sharalary keńesiniń atqarýshy dırektory Gýn Szánveı, TMD atqarýshy komıtetiniń tóraǵasy, atqarýshy hatshysy Sergeı Lebedev, Ujymdyq qaýipsizdik shart uıymy bas hatshysynyń orynbasary Amanjol Janqulıev, Ońtústik-SHyǵys Azıa memleketteri qaýymdastyǵynyń bas hatshysy Le Lyong Mın qatysýda.
Derekkóz: QazAqparat
