Psihologiialyq kómek ortalyǵynda erekshe balalardy tárbielep otyrǵan analar jumys isteitin bolady. Olar kásiptik oqytýdan ótip, erekshe balalardy tárbielep otyrǵan otbasylarǵa kómek kórsetetin bolady.
Aita keterligi, «Baqytty shańyraq» qoǵamdyq qory osymen tórtinshi ortalyǵyn ashyp otyr.
«Baqytty shańyraq múgedek balalary bar nemese tárbielep otyrǵan otbasylarǵa qoldaý jáne kómek kórsetý, turaqty damý» qory» qoǵamdyq qor mártebnsine ie. Onyń qyzmeti elordanyń túrli aýdandarynda múgedek balalary bar nemese olardy tárbielep otyrǵan 300-den astam otbasyn biriktiredi. Olarǵa azyq-túlik sebeti, bilim berý quraldary, kásipkerlik negizderine tegin oqytý sekildi túrli materialdyq, áleýmettik, bilim berý jáne psihologiialyq kómek kórsetiledi.
«Baqytty shańyraq» QQ tóraiymy Botagóz Sultanova otbasynda erekshe bala tárbielenip jatqan kópbalaly ana. Ol óziniń azamattyq ustanymyn, sondai-aq qoldaýdy qajet etetin otbasylarǵa kómek kórsetýde óz daǵdylaryn, tájiribesi men bilimin qalai qoldanýǵa bolatynyn kórsetedi.
– Bizdiń qorǵa turaqty qoldaý kórsetip, óz jobalarymyzdy júzege asyrýǵa múmkindik bergeni úshin qala ákimdigine alǵys bildiremiz. Ákimdik ylǵi da qol úshin berýge daiyn turady. Bul ómirde múmkin emes eshteńe joq, eger adam birnárseni ózgertkisi kelse, eńbek etýi kerek.
Elorda Ishki saiasat basqarmasynyń basshysy Dáýren Babamuratov psihologiialyq kómek ortalyǵynyń ashylýyna psihologtarmen, sol siiaqty áielder isteri jáne otbasylyq-demografiialyq saiasat jónindegi komissiia múshelerimen birlesip úlken daiyndyq jumystary júrgizilgenin atap ótti.
– Búgin qýanyshty jaǵdaidyń ortasynda otyrmyz. Biz erekshe balalardy tárbielep otyrǵan otbasylar úshin psihologiialyq kómek ortalyǵyn ashamyz. Bul óte mańyzdy oqiǵa, al ideiany «Baqytty shańyraq» QQ tóraiymy Botagóz Sultanova uzaq ýaqyttan beri josparlap kelgen edi. Qor byltyr erekshe qajettiligi bar bala tárbielep otyrǵan otbasylardy qoldaý úshin úlken jumys atqardy. Kóptegen is-sharalar ótkizildi.
Bul ortalyq Nur-Sultan qalasynyń psihologtarymen, áielder isteri jáne otbasylyq-demografiialyq saiasat jónindegi komissiia múshelerimen birlesip jasalǵan úlken daiyndyqtan keiin ashylýda. Osyǵan deiin erekshe balalardy tárbielep otyrǵan analar oqytyldy. Ortalyq jumysy nátijeli bolatynyna jáne naqty kómek kórsetetinine senimdimin, – dedi Ishki saiasat basqarmasynyń basshysy.
Esterińizge sala keteiik, 2020 jyldan beri elordada ákimdiktiń qoldaýymen túrli toptardyń bastamasymen ashylǵan 8 ortalyq jumys isteidi. Olar halyqtyń áleýmettik osal toptaryna kómek kórsetedi. Bul ortalyqtar tabysty jumys istep keledi. Olardyń qatarynda «Strong Mothers» bilim berý ortalyǵy, «Altyn Shańyraq Uiasy» kiim tigý tsehy, «Baqytty Shańyraq» qyzmet kórsetý boiynsha kópsalaly ortalyq bar.
