پسيحولوگيالىق كومەك ورتالىعىندا ەرەكشە بالالاردى تاربيەلەپ وتىرعان انالار جۇمىس ىستەيتىن بولادى. ولار كاسىپتىك وقىتۋدان ءوتىپ، ەرەكشە بالالاردى تاربيەلەپ وتىرعان وتباسىلارعا كومەك كورسەتەتىن بولادى.
ايتا كەتەرلىگى، «باقىتتى شاڭىراق» قوعامدىق قورى وسىمەن ءتورتىنشى ورتالىعىن اشىپ وتىر.
«باقىتتى شاڭىراق مۇگەدەك بالالارى بار نەمەسە تاربيەلەپ وتىرعان وتباسىلارعا قولداۋ جانە كومەك كورسەتۋ، تۇراقتى دامۋ» قورى» قوعامدىق قور مارتەبنسىنە يە. ونىڭ قىزمەتى ەلوردانىڭ ءتۇرلى اۋداندارىندا مۇگەدەك بالالارى بار نەمەسە ولاردى تاربيەلەپ وتىرعان 300-دەن استام وتباسىن بىرىكتىرەدى. ولارعا ازىق-تۇلىك سەبەتى، ءبىلىم بەرۋ قۇرالدارى، كاسىپكەرلىك نەگىزدەرىنە تەگىن وقىتۋ سەكىلدى ءتۇرلى ماتەريالدىق، الەۋمەتتىك، ءبىلىم بەرۋ جانە پسيحولوگيالىق كومەك كورسەتىلەدى.
«باقىتتى شاڭىراق» قق ءتورايىمى بوتاگوز سۇلتانوۆا وتباسىندا ەرەكشە بالا تاربيەلەنىپ جاتقان كوپبالالى انا. ول ءوزىنىڭ ازاماتتىق ۇستانىمىن، سونداي-اق قولداۋدى قاجەت ەتەتىن وتباسىلارعا كومەك كورسەتۋدە ءوز داعدىلارىن، تاجىريبەسى مەن ءبىلىمىن قالاي قولدانۋعا بولاتىنىن كورسەتەدى.
– ءبىزدىڭ قورعا تۇراقتى قولداۋ كورسەتىپ، ءوز جوبالارىمىزدى جۇزەگە اسىرۋعا مۇمكىندىك بەرگەنى ءۇشىن قالا اكىمدىگىنە العىس بىلدىرەمىز. اكىمدىك ىلعي دا قول ءۇشىن بەرۋگە دايىن تۇرادى. بۇل ومىردە مۇمكىن ەمەس ەشتەڭە جوق، ەگەر ادام بىرنارسەنى وزگەرتكىسى كەلسە، ەڭبەك ەتۋى كەرەك.
بىرگە جۇمىس ىستەيتىن ايەلدەردىڭ ەڭبەگىن كورىپ وتىرمىن. وسىعان دەيىن اشقان ورتالىعىمىز سەكىلدى مۇندا دا ەرەكشە بالالاردىڭ انالارى جۇمىس ىستەيتىن بولادى. ولار ءوز وتباسىمەن – اتا-اجەلەرىمەن، اكەلەرىمەن، دەنى ساۋ بالالارىمەن جۇمىس ىستەيتىن بولادى. ءقازىر قاتارىمىزدا 15 انا بار. سونداي-اق انيماتورلار قىزمەتىن اشتىق، ال وعان دەيىن انالارىمىزدى ارنايى وقىتتىق، – دەپ اتاپ ءوتتى بوتاگوز سۇلتانوۆا ورتالىقتىڭ اشىلۋى كەزىندە.
ەلوردا ىشكى ساياسات باسقارماسىنىڭ باسشىسى داۋرەن بابامۇراتوۆ پسيحولوگيالىق كومەك ورتالىعىنىڭ اشىلۋىنا پسيحولوگتارمەن، سول سياقتى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەلەرىمەن بىرلەسىپ ۇلكەن دايىندىق جۇمىستارى جۇرگىزىلگەنىن اتاپ ءوتتى.
– بۇگىن قۋانىشتى جاعدايدىڭ ورتاسىندا وتىرمىز. ءبىز ەرەكشە بالالاردى تاربيەلەپ وتىرعان وتباسىلار ءۇشىن پسيحولوگيالىق كومەك ورتالىعىن اشامىز. بۇل وتە ماڭىزدى وقيعا، ال يدەيانى «باقىتتى شاڭىراق» قق ءتورايىمى بوتاگوز سۇلتانوۆا ۇزاق ۋاقىتتان بەرى جوسپارلاپ كەلگەن ەدى. قور بىلتىر ەرەكشە قاجەتتىلىگى بار بالا تاربيەلەپ وتىرعان وتباسىلاردى قولداۋ ءۇشىن ۇلكەن جۇمىس اتقاردى. كوپتەگەن ءىس-شارالار وتكىزىلدى.
بۇل ورتالىق نۇر-سۇلتان قالاسىنىڭ پسيحولوگتارىمەن، ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەلەرىمەن بىرلەسىپ جاسالعان ۇلكەن دايىندىقتان كەيىن اشىلۋدا. وسىعان دەيىن ەرەكشە بالالاردى تاربيەلەپ وتىرعان انالار وقىتىلدى. ورتالىق جۇمىسى ناتيجەلى بولاتىنىنا جانە ناقتى كومەك كورسەتەتىنىنە سەنىمدىمىن، – دەدى ىشكى ساياسات باسقارماسىنىڭ باسشىسى.
ەستەرىڭىزگە سالا كەتەيىك، 2020 جىلدان بەرى ەلوردادا اكىمدىكتىڭ قولداۋىمەن ءتۇرلى توپتاردىڭ باستاماسىمەن اشىلعان 8 ورتالىق جۇمىس ىستەيدى. ولار حالىقتىڭ الەۋمەتتىك وسال توپتارىنا كومەك كورسەتەدى. بۇل ورتالىقتار تابىستى جۇمىس ىستەپ كەلەدى. ولاردىڭ قاتارىندا «Strong Mothers» ءبىلىم بەرۋ ورتالىعى، «التىن شاڭىراق ۇياسى» كيىم تىگۋ سەحى، «باقىتتى شاڭىراق» قىزمەت كورسەتۋ بويىنشا كوپسالالى ورتالىق بار.
