"Nur Otannyń" tósbelgisin taqpai júr". Eldiń bas sanitaryna eskertý jasaldy
Qazaqstan Respýblikasynyń densaýlyq saqtaý vitse-ministri – elimizdiń bas sanitar dárigeri Erlan Qiiasovqa sógis jariialandy. Bul týraly Nur Otan partiialyq baqylaý komitetiniń basshysy Artýr Platonov Faceboook paraqshasynda jazdy.
Depýtattyń aitýynsha, adamdar oǵan áleýmettik jeli arqyly shaǵymdanǵan. Olar ministr orynbasarlary men óńirlerdegi sheneýnikter azamattarmen kezdesý kezinde qandai da bir másele boiynsha "partiialyq mindettemeni oryndaýdan qashatynyn" aitqan.
Artýr Platonovtyń sózinshe, azamattar elde bári qymbattap jatqanyn jetkizgen. Sondai sátte partiia tósbelgisin taqpaityn sheneýnikter jaýapkershilikten jaltaryp ketetinin aitqan.
"2019 jyldyń 21 tamyzyndaǵy Saiasi keńestiń keńeitilgen otyrysynda Nur Otan partiiasynyń tóraǵasy Nursultan Ábishuly Nazarbaev partiiany qaita jańartý baǵdarlamasynyń negizgi tezisteriniń biri – dárejesine, laýazymyna, mártebesine qaramastan partiia tártibin, sailaýshylar aldyndaǵy jaýapkershilikti arttyrý ekenin málimdedi. Onyń ishinde partiia quramynda bar ekenin kórsetetin partiia nyshanyna qurmet máselesi de bar", - dep jazdy Platonov.
Kei myrzalar azamattardyń aldynda óz jumysynan uiala ma? Álde partiia belgisin taǵar bolsa, kostiýmin búldirip alýdan qorqa ma? dep saýal qoidy komitet basshysy.
"Densaýlyq saqtaý vitse-ministri E.A. Qiiasov, Qyzylorda oblysy ákiminiń orynbasary B.D. Jahanov, Almaty qalasy ákiminiń orynbasary M.S. Kikimov, Shyǵys Qazaqstan oblysy ákiminiń orynbasary Sh.S. Býktýgýtov, Jezqazǵan qalasynyń ákimi Q.B. Ábsattarov partiia nyshanynsyz júrýdi artyq kóretinin aitýǵa májbúrmiz", - dep jazdy Platonov.
Osyǵan bailanysty Qiiasovqa sógis berilip, qalǵan sheneýnikterge eskertý jasaldy.
