«Nur Otan» meditsina qyzmetkerleriniń kásibi qyzmetin saqtandyrý týraly zań jobasyn synǵa aldy
Zań jobasy emdelýshi syrqatynyń aýyrlyǵyn jáne onyń densaýlyq saqtaý mekemesindegi jaǵdaiyn eskermesten, meditsina qyzmetkeriniń naýqastyń ómiri men densaýlyǵyna keltirgen ziianyn óteý mindetin kózdeidi. Keńes múshesi Tatiana Býlgatsevich atap ótkendei, zańnamada «meditsinalyq qater» degen uǵym joq.
– Bizdiń qyzmetkerler jumys isteitin jaǵdaidy dárigerler emes, memleket, biýdjet múmkindikteri anyqtaidy. Aýyldyq aýrýhanadaǵy rentgen apparaty 1960 jyly shyǵarylǵan, sonyń saldarynan diagnostikalyq qatelikterdiń bolý qaýpi joǵary. Ártúrli jaǵdailar bolady, háli aýyr, tipti emdelmeitin naýqastar da bar. Olarǵa qansha qalasańyz da kómektesý múmkin emes. Dárigerler ǵajaiyptar jasai almaǵany úshin kináli bolady ma? – dep atap ótti Tatiana Býlgatsevich.
Spiker sondai-aq zań jobasynyń mátininde dárigerdiń baiqaýsyzda qatelik jibergeni nemese diagnostikalyq protsedýralardy júrgizýdegi olqylyǵy úshin jaýapkershiligi kózdelgenine nazar aýdardy.
– Mundai jaǵdaida dárigerler tek aiyptaýdan qorqyp, tipti tumaýmen aýyrǵan kezde de molekýlalyq-biologiialyq zertteýlerdi taǵaiyndaidy. Bul giperdiagnostikaǵa ákeledi. Al Densaýlyq saqtaý resýrstaryn ásirese, qazirgidei kovid pandemiiasy jaǵdaiynda únemdep paidalaný qajet. Mamandyq tartymdylyǵyn joǵaltyp, saladan mamandardyń ketýi meditsinalyq kómek sapasynyń tómendeýine ákeledi. Munyń barlyǵynan túptep kelgende emdelýshiler zardap shegedi, – dedi Tatiana Býlgatsevich.
Sonymen qatar, partiialyqtar QR Qylmystyq kodeksindegi 317-bapty – «Meditsina nemese farmatsevtika qyzmetkerleriniń kásibi mindetterin tiisinshe oryndamaýyn» talqylady. Keńes músheleriniń pikirinshe, bul norma meditsina qyzmetkerleriniń quqyqtaryna nuqsan keltiredi.
Otyrys qorytyndysynda Keńes Densaýlyq saqtaý ministrligine QR Qylmystyq kodeksiniń, onyń ishinde 317-baby boiynsha, elimizde «meditsina qyzmetkerlerine qatysty kásibi mindetterin tiisinshe oryndamaǵany úshin» qozǵalǵan isterdiń esebin jáne taldaýyn engizýdi usyndy. Múddeli memlekettik organdarmen birlesip, vedomstvo QR QK 317-babyn qaita qaraý boiynsha Parlamentke usynystar engizýdi qamtamasyz etýi tiis.
