Saltanat Núkenovanyń aǵasy Aitbek Amangeldi qaryndasy men kásipker Raiymbek Batalovqa qatysty máselege núkte qoidy, - dep habarlaidy Dalanews.kz.
Aitbek Amangeldi sot otyrysynan keiin áleýmettik jelidegi paraqshasynda tikelei efirge shyǵyp, "Saltanat Batalovtyń kóńildesi bolǵan ba?" degen suraqqa jaýap berdi.
"Búgin basty sot tergeýi aiaqtaldy. Búgin biz beinejazbalardy qaita qaradyq jáne men qazir tek bir máseleni talqylap, núktesin qoiǵym keledi. Óitkeni bul taqyryp óte mańyzdy. Men bul týraly sońǵy ret aityp otyrmyn dep úmittenemin. Men qazir Linara (Batalovtyń áieli) jáne Raiymbek Batalovqa heit ketip jatqanyn bilemin. Men olar da sot otyrysynan zardap shekken basqa da taraptar sekildi jábirlenýshi dep oilaimyn. (...) Keshe biz telefonnan beinejazbany qaraǵan kezde sýdia vileolardyń aiaq jaǵyn ǵana qoidy, sondyqtan kópshilik túsinbei qaldy. Videonyń basynda Saltanat uzaq ýaqyt boiy ózine qoiylǵan suraqtarǵa naqty jaýap beredi, al aiyptalýshy suraqtyń jaýaby ózine yńǵaily bolmaiynsha qaitalap qoia berdi", - deidi Saltanattyń aǵasy.
24 sáýirde ótken sot otyrysynda qaiǵyly oqiǵa bolǵan kúni túsirilgen videolar qaitadan kórsetilgen bolatyn. Ol jerde Bishimbaev Saltanattan "Batalovtyń kóńildesi boldyń ba?" dep qaita-qaita suraidy.
Aitbek Amangeldi kórsetken beinejazbada Saltanat tanymal kásipker Raiymbek Batalovpen ózin eshnárse bailanystyrmaitynyn, aralarynda eshnárse joǵyn naqty aitady.
"Men budan basqa qandai túsinikteme, dálel qajet ekenin bilmeimin. Shynymdy aitsam maǵan báribir. Sot aiasynda biz bárin dáleldedik. Videonyń bul bóligi nelikten tikelei efirde estilmegenin bilmeimin. Óitkeni biz adamdar Saltanattyń daýysyn estýi úshin ádeii osy videony tyńdaýǵa qoiǵan bolatynbyz. Sondyqtan bul jai ǵana - fakt. Ol aýrý suraǵyna jaýap alý úshin ony túni boiy azaptady. Men onyń nege Raiymbek Batalovqa sonsha qyzǵanyshpen qaraitynyn bilmeimin, túsinbeimin. Biraq men másele onyń basynda, miynda ekenin bilemin. Ol ózine qyzǵanýǵa sebep oilap taýyp, motiv jasady. Keshe maǵan kóptegen adam Saltanatty túsinde kórgenin, tús boiynsha Saltanat sot zalynda otyrǵanyn jazdy. Olardyń aitýynsha, osyndai tústi biz sotta videolardy kórip bastaǵannan bir tún buryn birneshe adam bir ýaqytta kórgen. Túste Saltanat búgin jeńis bolatynyn aitqan. Aitpaqshy, eń basynda, menen jaýap alǵan kezde, men advokatqa eger Salta qazir tiri bolsa, sottalýshy Saltanatty tipti advokattan qyzǵanatynyn aitqan edim. Bul sottalýshynyń jeke máselesi, aýytqýshylyǵy", - dep qorytyndylady Aitbek Amangeldi.
Eske salaiyq, buǵan deiin kásipker Raiymbek Batalovtyń ózi de bul aqparattardy teriske shyǵarǵan bolatyn.
Batalov sot otyrysyna qatysty sońyna deiin ún qatqysy kelmegenin aitty. Onyń sózinshe, atyna nuqsan keltiretin sumdyq aqparattar málimdeme jasaýǵa májbúr etken.
"Aýyr qylmys jasady degen aiyptalýshynyń maǵan qatysty aitqany - bos sandyraq, ótirik. Sizderdi bul ótirikke senbeýge, BAQ ókilderi men blogerlerdi jalǵan aqparat taratpaýǵa shaqyramyn. Osyndai qaiǵyǵa tap bolǵan Saltanattyń týystary men jaqyndary qyzynyń abyroiyn qorǵaýǵa májbúr bolǵany óte ókinishti. Bul sumdyq. Núkenovtar otbasyna shyn júrekten kóńil aitamyn", - dedi Batalov.
Buǵan deiin kásipker Raiymbek Batalovtyń áieli Lenara Batalova da Bishimbaev isine qatysty pikir bildirgen edi.
"Men bolǵan jaitqa qatysty pikir bildirsem dep edim. Sebebi meniń instagramym "jarylaiyn" dep tur. Keshe el bolyp atyshýly protseske kýá boldyq. Protsess 1 sáýirge sáikes kelip qaldy. Onyń mazmuny da soǵan sai bolǵan sekildi. Biz atyshýly isti emes, "Pýst govoriat" shoýyn kórip otyrǵandai boldyq. Sotta meniń otbasymnyń abyroiyna nuqsan keltirgen negizsiz, oiǵa qonymsyz nárselerge qatysty ne derimdi bilmeimin. Saltanattyń jaqyndaryna sabyr men kúsh-qýat tileimin jáne ádildik ornaidy dep senemin. Biz sizdermen birgemiz", - deidi Lenara Batalova.
Raiymbek Batalov - quramyna Raimbek Agro, Raimbek Group Plus, City Fair Trade ltd, Raimbek Bottlers Group kompaniialary kiretin Raimbek Group holdinginiń iesi jáne direktorlar keńesiniń tóraǵasy.
Qazirgi tańda "Atameken" tóralqasynyń tóraǵasy.
