Ádebiet salasyndaǵy Nobel syilyǵynyń laýreaty, belgili qytai jazýshysy Mo Ian «Kitap oqityn ult» respýblikalyq kitap oqý marafonyna qatysýshylaryna úndeý joldap, qazaqstandyq oqyrmandarǵa shabyt, tabys jáne ádebiet áleminde jańa jańalyqtar ashýdy tiledi, dep habarlaidy dalanews.kz.
Óziniń beineúndeýinde jazýshy «Sarymsaq jyry» kitabi qazaq tiline aýdarylyp, marafon aiasynda oqylatyn shyǵarmalar tizimine engenin atap ótti.
«Meniń «Sarymsaq jyry» romanymnyń qazaq tiline aýdarylyp, osy marafon shyǵarmalar tizimine engenine óte qýanyshtymyn», — dedi Mo Ian.
Jazýshy sondai-aq Qazaqstanǵa jasaǵan sapary men qazaqstandyq qalamgerlermen kezdesýleri týraly aitty. Ol qazaq ádebietimen tanysý eki eldiń ádebi dástúrleri arasynda erekshe jaqyndyq bar ekenin sezinýge múmkindik bergenin atap ótti.
«Qazaq ádebieti maǵan óte jaqyn ári qymbat. Óitkeni sizderdiń shyǵarmalaryńyzda sýretteletin ómirdiń kóp qyry ózimniń basymnan ótkergen jaǵdailarmen úndesedi», — dedi jazýshy.
Mo Ian «Kitap oqityn ult» bastamasynyń mádeniet pen qoǵamdy damytýdaǵy mańyzyn da erekshe atap ótti.
«Jalpy, kitap oqýǵa arnalǵan osyndai jalpyulttyq marafon uiymdastyrǵandaryńyz óte jaqsy. Bul — ulttyq mádenietti damytýǵa yqpal etip qana qoimai, qoǵamnyń damýyna da eleýli úles qosatyn igi ári izgi is», — dedi ol.
Marafonǵa qatysýshylarǵa arnaǵan sózinde jazýshy olarǵa kitap álemine sapar barysynda shabyt tiledi.
«Kitap álemine saiahat jasap, bilim men danalyqtyń biigine umtylǵan árbir qatysýshyǵa zor shabyt tileimin! Árbir paraq júrekterińizge jaryq syilap, ishki jan dúnielerińizdi baiyta bersin. Kitap árdaiym qoldaryńyzdan túspesin, al bilimge umtylystaryńyz ben ózin-ózi damytý jolyndaǵy talpynystaryńyz árdaiym jetistikpen jalǵasa bersin!», - dedi Mo Ian.
Sóz sońynda Mo Ian qazaqstandyq oqyrmandarǵa alǵysyn bildirip, olardy birge jańa ádebi kókjiekterdi ashýǵa shaqyrdy.
Mo Ian — ádebiet salasyndaǵy Nobel syilyǵynyń laýreaty. Ol 2012 jyly ádebiet boiynsha Nobel syilyǵyna ie boldy.
Jazýshynyń eń tanymal shyǵarmalarynyń qatarynda «Qyzyl gaolian» jáne «Sarymsaq jyry» romandary bar. Nobel komitetiniń málimetinshe, onyń shyǵarmashylyǵynda dástúrli qytai ádebieti men aýyz ádebieti dástúrleriniń elementteri zamanaýi áleýmettik taqyryptarmen ushtasady.
