Májilistiń eks-spikeri Nurlan Nyǵmatýlinniń syńary – májilis pen senattyń burynǵy depýtaty Erlan Nyǵmatýlinge tiesili YDD Corporation ferroqorytpa zaýyty eki saǵat boiy tótenshe jaǵdailar qyzmetine habar bermei, qutqarýshylardy kirgizýden bas tartqan, dep habarlaidy Dalanews.kz.
Bul týraly Tótenshe jaǵdailar vitse-ministri Baýyrjan Syzdyqbaev málim etti.
"Tótenshe jaǵdai tańǵy 4:10-da oryn aldy, ókinishke qarai habarlama bizge eki saǵattan keiin, iaǵni 6.08-de keldi. Azamattyq qorǵaý týraly respýblikalyq zańnamaǵa sáikes, buǵan jol berýge bolmaidy jáne bul úshin zań boiynsha jaýapkershilikke tartylady", – dedi Syzdyqbaev úkimet brifinginde.
Osyǵan bailanysty 200 AEK (738,4 myń teńge) kóleminde aiyppul salynyp, ákimshilik is qozǵalǵan. Vitse-ministr is qazir sotta ekenin jetkizdi.
Syzdyqbaev zaýyt óz aýmaǵyna qutqarýshylardy kirgizbegenin rastady.
"Mundai nysan aýmaǵynda, iaǵni ýchaskede ózderiniń qutqarý bólimsheleri bar jáne olar óz betterinshe órtti óshirýge tyrysty. Biraq munda shaqyrtý kelip túskendikten, bizdiń qutqarýshylar keldi, sol úshin olardy kirgizýi kerek edi", – dedi ol.
Eske salaiyq, 20 shildede, tańǵy saǵat 04:10-da YDD Corporation ferroqorytpa zaýytynda shtattan tys jaǵdai boldy. Oqysta №1 peshten jalyn shyǵyp, saldarynan kásiporynnyń 8 qyzmetkeri túrli dárejedegi jaraqat aldy.
Kompaniia senbi kúni, 20 shildeniń tańynda zardap shekken barlyq qyzmetkerdiń aýrýhanada jatqanyn, olarǵa shuǵyl meditsinalyq kómek kórsetiletinin aitty.
"Kompaniia zardap shekkenderge barlyq kómek kórsetedi jáne aýrýhananyń meditsinalyq qyzmetkerlerimen únemi bailanysta bolady", - dep sendirdi YDD.
YDD Corporation ferroqorytpa zaýyty Qaraǵandyda ornalasqan. Jylyna shamamen 240 myń tonna ferrosilitsii óndiredi. "YDD Corporation" JShS quryltaishysy kompaniianyń teń iesi Erlan Nyǵmatýlin boldy. 2021 jyly Forbes Kazakhstan nusqasy boiynsha Qazaqstannyń eń yqpaldy 50 biznesmeniniń reitingine kirdi.
Aita keteiik, buǵan deiin órtke bailanysty Qaraǵandyda Erlan Nyǵmatýlinge tiesili zaýytty respýblikalyq deńgeide komissiia tekseretini aitylǵan edi.
Komissiia quramyna: Qaraǵandy oblysynyń bas memlekettik eńbek inspektory, ónerkásiptik qaýipsizdik komitetiniń aýmaqtyq departamentiniń jáne jumys berýshiniń ókilderi kirdi",-dep habarlady Qaraǵandy oblysynyń eńbek inspektsiiasy basqarmasynyń baspasóz qyzmeti.
