Arǵy da bergi qazaq tarihynda urpaq umytpaýy tiis dańqty uldar ótken. Olardyń erligi men ómir joly keleshek úshin dáriptelýi tiis. Shyńǵys hannyń úlken uly, erjúrek qolbasshy Joshy hannyń qazaq topyraǵynda qurǵan memleketi – Joshy ulysy qazaq memlekettiliginiń túp bastaýynda tur. Olai deitinimiz, Joshy ulysy tórt uly handyqtyń biri bolýymen qatar, ózinen keiin Altyn Orda degen alyp imperiianyń, keiingi handyqtardyń qalyptasýyna negiz boldy. Tarihshy ǵalymdar «Joshynyń Ortalyq Qazaqstanda jerlenýi týraly ańyz kezdeisoq paida bolmaǵanyn, áskeri qolbasshy, diplomat retinde Joshy ózin talai joryqtarda moiyndatqanyn» aitady. Dańqty Joshy ulysy qurylǵanyna biyl 800 jyl.
Memleket basshysy Atyraýda ótken Ulttyq quryltaidyń úshinshi otyrysynda Joshy ulysynyń qazaq tarihy úshin mán-mańyzy biik ekenine erekshe toqtaldy. Prezident Qazaqstan – uly daladaǵy kóshpendiler órkenietiniń tikelei murageri ekenin aityp, jer júzine Altyn Orda degen atpen tanylǵan áigili Joshy ulysy Ortalyq Eýraziianyń baitaq dalasyndaǵy eń qýatty memleket retinde moiyndalǵanyn málimdedi:
«Joshy áýleti 6 ǵasyr boiy Ortalyq Eýraziianyń taǵdyryna tikelei yqpal etti. Ulan-ǵaiyr aýmaqta birtutas órkeniet qurýǵa umtyldy. Joshy ulysy Uly dalany meken etken halyqtardyń san ǵasyrlyq damý baǵdaryn aiqyndap otyrdy. Ulyq ulys memleketti basqarý isin jańa deńgeige kóterdi. Onyń Rim imperiiasymen uqsastyǵy da – osynda. Biyl Joshy ulysynyń negizi qalanǵanyna 800 jyl toldy. Búgingi jiynymyz da osy mereili beleske tuspa-tus kelip otyr. Joshy ulysy Qazaqstannyń memlekettilik dástúrinde airyqsha oryn alady. Elimizdiń ótkeni, búgini men bolashaǵy onyń tarihi murasymen tyǵyz astasyp jatyr. Endeshe, Altyn Orda týraly halyqaralyq arenadaǵy túsinik Qazaqstanmen tikelei bailanysty bolýy kerek», – dedi Prezident.
Memleket basshysy Qasym-Jomart Toqaev Qazaqstannyń jeti tomnan turatyn jańa akademiialyq tarihyn jazý jumystary júieli júrip jatqanyn, eńbektiń derbes bir tomy Joshy ulysyna arnalatynyn aitty.
QR Premer-Ministri Oljas Bektenov depýtattyq saýalǵa bergen jaýabynda «Joshy ulysynyń 800 jyldyǵyn ótkizý jónindegi 30 is-sharadan turatyn jalpy respýblikalyq jospar bekitilgenin, onda Joshy týraly tolyqmetrajdy kórkem film jáne «Altyn Orda» tarihi serialyn túsirý máselesin pysyqtaý, qalalarda Joshy eskertkishin ornatý sharalary kózdelgenin» málimdegen edi. Bul jumystardyń túp bastaýy retinde Joshy ulysynyń qazaq tarihyndaǵy rólin dáripteý maqsatynda aǵylshyn tilindegi gibridti derekti-dramalyq telehikaia túsiriletini belgili boldy.
Izgi bastamany «Dara» prezidenttik bastamalar qory «Karga Seven Pictures» kinostýdiiasymen birlese otyryp júzege asyrady. Shyńǵys hannyń úlken uly Joshy hannyń ómirine arnalǵan týyndy alty seriiadan turady. Bul týraly «Dara» Prezidenttik bastamalar qorynyń baspasóz qyzmeti málimdegen edi. Týyndyda Altyn Orda imperiiasynyń damý kezeńderi Joshy hannyń ómiriniń tarihy negizinde túsiriledi.
Karga Seven Pictures – Los-Andjeleste mamandandyrylǵan prodiýserlik kompaniia. Quryltaishylarynyń biri – Emre Shahin. 2008 jyly Karga Seven Pictures AQSh-ta ashyldy. Búgingi kúni Karga Seven – Los-Andjeles pen Ystambulda keńseleri bar, daryndy ári kópultty komanda jinaǵan kompaniia. Kompaniianyń týyndylary birneshe márte halyqaralyq syilyqtarǵa, sonyń ishinde halyqaralyq televiziialyq syilyq Emmy Award-qa usynylǵan. Sonymen qatar, Karga Seven Pictures buǵan deiin de tarihi týyndylarymen álem jurtshylyǵyna jaqsy tanymal, ol Netflix úshin «Imperiianyń órleýi: Osman imperiiasy» jáne «Kelisim: Musanyń hikaiasy» sekildi serialdar túsirgen, al olar 90-nan asa elde úzdik 10 serialǵa ainaldy. Endi Netflix-ke tarihi drama túsirgen kinostýdiia Joshy han týraly telehikaiany jaryqqa shyǵarady. Túsirilim 2024 jyldyń kúzinde Qazaqstan men Túrkiiada bastalady dep josparlanyp otyr.
«Joshy hannyń ómir tarihy keremet epikalyq, ol dúnie júzindegi kórermenderdi qyzyqtyrary sózsiz. Osy aýqymdy tarihi jobany júzege asyrýda «Dara» qorymen birlesip, jumys jasaý biz úshin úlken mártebe», – dep atap ótti Karga Seven Pictures kreativti direktor Emre Shahin.
Bul derekti-drama qazaq halqynyń túp tarihyn keń kólemde kórsetetinine, ony tórtkúl dúniege dáriptep, tanytatynyna senim mol.
