ارعى دا بەرگى قازاق تاريحىندا ۇرپاق ۇمىتپاۋى ءتيىس داڭقتى ۇلدار وتكەن. ولاردىڭ ەرلىگى مەن ءومىر جولى كەلەشەك ءۇشىن دارىپتەلۋى ءتيىس. شىڭعىس حاننىڭ ۇلكەن ۇلى، ەرجۇرەك قولباسشى جوشى حاننىڭ قازاق توپىراعىندا قۇرعان مەملەكەتى – جوشى ۇلىسى قازاق مەملەكەتتىلىگىنىڭ ءتۇپ باستاۋىندا تۇر. ولاي دەيتىنىمىز، جوشى ۇلىسى ءتورت ۇلى حاندىقتىڭ ءبىرى بولۋىمەن قاتار، وزىنەن كەيىن التىن وردا دەگەن الىپ يمپەريانىڭ، كەيىنگى حاندىقتاردىڭ قالىپتاسۋىنا نەگىز بولدى. تاريحشى عالىمدار «جوشىنىڭ ورتالىق قازاقستاندا جەرلەنۋءى تۋرالى اڭىز كەزدەيسوق پايدا بولماعانىن، ءاسكەري قولباسشى، ديپلومات رەتىندە جوشى ءوزىن تالاي جورىقتاردا مويىنداتقانىن» ايتادى. داڭقتى جوشى ۇلىسى قۇرىلعانىنا بيىل 800 جىل.
مەملەكەت باسشىسى اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا جوشى ۇلىسىنىڭ قازاق تاريحى ءۇشىن ءمان-ماڭىزى بيىك ەكەنىنە ەرەكشە توقتالدى. پرەزيدەنت قازاقستان – ۇلى دالاداعى كوشپەندىلەر وركەنيەتىنىڭ تىكەلەي مۇراگەرى ەكەنىن ايتىپ، جەر جۇزىنە التىن وردا دەگەن اتپەن تانىلعان ايگىلى جوشى ۇلىسى ورتالىق ەۋرازيانىڭ بايتاق دالاسىنداعى ەڭ قۋاتتى مەملەكەت رەتىندە مويىندالعانىن مالىمدەدى:
«جوشى اۋلەتى 6 عاسىر بويى ورتالىق ەۋرازيانىڭ تاعدىرىنا تىكەلەي ىقپال ەتتى. ۇلان-عايىر اۋماقتا ءبىرتۇتاس وركەنيەت قۇرۋعا ۇمتىلدى. جوشى ۇلىسى ۇلى دالانى مەكەن ەتكەن حالىقتاردىڭ سان عاسىرلىق دامۋ باعدارىن ايقىنداپ وتىردى. ۇلىق ۇلىس مەملەكەتتى باسقارۋ ءىسىن جاڭا دەڭگەيگە كوتەردى. ونىڭ ريم يمپەرياسىمەن ۇقساستىعى دا – وسىندا. بيىل جوشى ۇلىسىنىڭ نەگىزى قالانعانىنا 800 جىل تولدى. بۇگىنگى جيىنىمىز دا وسى مەرەيلى بەلەسكە تۇسپا-تۇس كەلىپ وتىر. جوشى ۇلىسى قازاقستاننىڭ مەملەكەتتىلىك داستۇرىندە ايرىقشا ورىن الادى. ەلىمىزدىڭ وتكەنى، بۇگىنى مەن بولاشاعى ونىڭ تاريحي مۇراسىمەن تىعىز استاسىپ جاتىر. ەندەشە، التىن وردا تۋرالى حالىقارالىق ارەناداعى تۇسىنىك قازاقستانمەن تىكەلەي بايلانىستى بولۋى كەرەك»، – دەدى پرەزيدەنت.
مەملەكەت باسشىسى قاسىم-جومارت توقايەۆ قازاقستاننىڭ جەتى تومنان تۇراتىن جاڭا اكادەميالىق تاريحىن جازۋ جۇمىستارى جۇيەلى ءجۇرىپ جاتقانىن، ەڭبەكتىڭ دەربەس ءبىر تومى جوشى ۇلىسىنا ارنالاتىنىن ايتتى.
ق ر پرەمەر-مينيسترى ولجاس بەكتەنوۆ دەپۋتاتتىق ساۋالعا بەرگەن جاۋابىندا «جوشى ۇلىسىنىڭ 800 جىلدىعىن وتكىزۋ جونىندەگى 30 ءىس-شارادان تۇراتىن جالپى رەسپۋبليكالىق جوسپار بەكىتىلگەنىن، وندا جوشى تۋرالى تولىقمەتراجدى كوركەم فيلم جانە «التىن وردا» تاريحي سەريالىن ءتۇسىرۋ ماسەلەسىن پىسىقتاۋ، قالالاردا جوشى ەسكەرتكىشىن ورناتۋ شارالارى كوزدەلگەنءىن» مالىمدەگەن ەدى. بۇل جۇمىستاردىڭ ءتۇپ باستاۋى رەتىندە جوشى ۇلىسىنىڭ قازاق تاريحىنداعى ءرولىن دارىپتەۋ ماقساتىندا اعىلشىن تىلىندەگى گيبريدتى دەرەكتى-درامالىق تەلەحيكايا تۇسىرىلەتىنى بەلگىلى بولدى.
ىزگى باستامانى «Dara» پرەزيدەنتتىك باستامالار قورى «Karga Seven Pictures» كينوستۋدياسىمەن بىرلەسە وتىرىپ جۇزەگە اسىرادى. شىڭعىس حاننىڭ ۇلكەن ۇلى جوشى حاننىڭ ومىرىنە ارنالعان تۋىندى التى سەريادان تۇرادى. بۇل تۋرالى «Dara» پرەزيدەنتتىك باستامالار قورىنىڭ باسپا ءسوز قىزمەتى مالىمدەگەن ەدى. تۋىندىدا التىن وردا يمپەرياسىنىڭ دامۋ كەزەڭدەرى جوشى حاننىڭ ءومىرىنىڭ تاريحى نەگىزىندە تۇسىرىلەدى.
Karga Seven Pictures – لوس-اندجەلەستە مامانداندىرىلعان پروديۋسەرلىك كومپانيا. قۇرىلتايشىلارىنىڭ ءبىرى – ەمرە شاحين. 2008 جىلى Karga Seven Pictures اقش-تا اشىلدى. بۇگىنگى كۇنى Karga Seven – لوس-اندجەلەس پەن ىستامبۇلدا كەڭسەلەرى بار، دارىندى ءارى كوپۇلتتى كوماندا جيناعان كومپانيا. كومپانيانىڭ تۋىندىلارى بىرنەشە مارتە حالىقارالىق سىيلىقتارعا، سونىڭ ىشىندە حالىقارالىق تەليەۆيزيالىق سىيلىق Emmy Award-قا ۇسىنىلعان. سونىمەن قاتار، Karga Seven Pictures بۇعان دەيىن دە تاريحي تۋىندىلارىمەن الەم جۇرتشىلىعىنا جاقسى تانىمال، ول Netflix ءۇشىن «يمپەريانىڭ ورلەۋى: وسمان يمپەرياسى» جانە «كەلىسىم: مۇسانىڭ حيكاياسى» سەكىلدى سەريالدار تۇسىرگەن، ال ولار 90-نان اسا ەلدە ۇزدىك 10 سەريالعا اينالدى. ەندى Netflix-كە تاريحي دراما تۇسىرگەن كينوستۋديا جوشى حان تۋرالى تەلەحيكايانى جارىققا شىعارادى. ءتۇسىرىلىم 2024 جىلدىڭ كۇزىندە قازاقستان مەن تۇركيادا باستالادى دەپ جوسپارلانىپ وتىر.
«جوشى حاننىڭ ءومىر تاريحى كەرەمەت ەپيكالىق، ول دۇنيە جۇزىندەگى كورەرمەندەردى قىزىقتىرارى ءسوزسىز. وسى اۋقىمدى تاريحي جوبانى جۇزەگە اسىرۋدا «Dara» قورىمەن بىرلەسىپ، جۇمىس جاساۋ ءبىز ءۇشىن ۇلكەن مارتەبە»، – دەپ اتاپ ءوتتى Karga Seven Pictures كرەاتيۆتى ديرەكتور ەمرە شاحين.
بۇل دەرەكتى-دراما قازاق حالقىنىڭ ءتۇپ تاريحىن كەڭ كولەمدە كورسەتەتىنىنە، ونى تورتكۇل دۇنيەگە دارىپتەپ، تانىتاتىنىنا سەنىم مول.
