Sonymen qatar mamandar NEET sanatyna jatatyn jastar oqymaityn, jumys istemeitin jáne biliktiligin arttyrýǵa qulyqsyz jastardy jatqyzý kerek ekenin aitýda.
Elimizdegi jastar saiasatyna jaýapty memlekettik mekemelerdiń derekterine nazar aýdaratyn bolsaq búginde elimizde NEET sanatyndaǵy jastardyń úlesi 6,3%-dy quraidy. Bul – derek biraz jastarymyzdyń ómirden ornyn taba almai júrgenin kórsetedi. Mundai jastarǵa memleket tarapynan qamqorlyq qajet.
Búginde Úkimet NEET sanatyndaǵy jastardyń jumysqa ornalasýyna jáne basqa da muń-muqtajyn esepke alyp olarǵa qoldaý kórsetýge kóńil bólýde.
Al jastar isimen ainalysatyn quzyrly oryndar elimizde NEET sanatyna jatatyn jastardy 4 topqa bólip qarastyrýdy jón kóripti. Muny QR Aqparat jáne qoǵamdyq damý vitse-ministri Daniiar Qadirov atap kórsetken bolatyn.
Búginde elimizde jergilikti atqarýshy organdardyń derekteri negizinde NEET sanatyndaǵy jastar týraly derekter bazasy daiyndalýda. Osy derekter bazasyna 4 topty engizý josparlanýda.
Olardyń úlken shoǵyryn jumyssyz jastar quraityny belgili. Bul topqa kolledjder men joǵary oqý oryndarynda oqityn, bas bostandyǵynan aiyrylǵan jáne áskeri boryshyn ótep júrgen jastar jatady.
Al ekinshi topty óndiristik qyzmetke qabiletti jáne múmkindikteri shekteýli jastar kirip otyr.
Úshinshi topqa jatatyndardy «belsendi emes jastar» dep at qoiyp, aidar taǵypty. Bularǵa alkogoldik ishimdik pen nashaqorlyqqa salynǵan jáne sozylmaly aýrý túrlerine shaldyqqan jastardy jatqyzady ekenbiz. Bul topqa jatatyn jastardy ońaltý ortalyqtaryna jiberip, qoǵamdyq ómirge qaita qosýdyń mańyzy zor.
Sońǵy tórtinshi topqa – úi sharýasymen ainalysatyn jastardy jatqyzady ekenbiz. Mundai jastar otbasylyq bizneske kómek kórsetip, betegeden biik, jýsannan alasa bolyp júre beretini belgili. Biraq olardyń qoǵamdaǵy áleýmettik statýsy aiqyndalmaǵan.
Bul jerde NEET sanatynyń úshinshi tobyna jatatyn jastarmen jumys isteýdiń mańyzy joǵary bolyp tur. Osy rette Úkimet dál osy topqa jatatyn jastar úshin eńbek jasaqtaryn qurýdy kózdep otyr. Osylaisha olardy eńbekke aralastyryp ómirden óz jolyn taýyp ketýine yqpal etpekshi.
