Qazaqstannyń Tuńǵysh prezidentiniń nemeresi Nuráli Áliev ájesi Sara Alpysqyzy Nazarbaeva bastamashy bolǵan "Ózin-ózi taný" pánin ári qarai damytýǵa nietti ekenin málimdedi, dep habarlaidy dalanews.kz.
Nuráli Áliev bul týraly suhbattarynyń birinde aityp, jas urpaqqa rýhani-adamgershilik tárbie berýdiń mańyzdy ekenin atap ótken.
"Ózin-ózi taný" páni Qazaqstan mektepterindegi mindetti oqý baǵdarlamasyna 2010-2011 oqý jylynda engizilgen edi. Atalǵan baǵdarlama Sara Nazarbaevanyń bastamasymen qolǵa alynyp, oqýshylardyń boiynda adamgershilik, meiirimdilik, izgilik jáne ishki úilesimdilik qalyptastyrýǵa baǵyttalǵan kýrs retinde usynylǵan.
Alaida 2022 jyly Qazaqstannyń Oqý-aǵartý ministrligi bul pándi mindetti sabaqtar qatarynan alyp tastaý týraly sheshim qabyldady. Ministrlik buiryǵyna sáikes, "Ózin-ózi taný" mindetti pán mártebesinen aiyrylyp, fakýltativtik sabaq formatyna aýystyryldy.
Osyǵan bailanysty Nuráli Áliev atalǵan baǵytty qaita jandandyryp, rýhani tárbie máselesine kóbirek kóńil bólý qajet ekenin jetkizgen.
