Nursultan Nazarbaevtyń qyzy Dinara Qulybaeva Almatydaǵy kósheniń birin jer telimi retinde jekemenshikke rásimdep alǵan, dep habarlaidy Dalanews.kz.
Bul týraly májilis depýtaty Baqytjan Bazarbek málimdedi.
"Áriptesim, Májilis depýtaty Sergei Mihailovich Ponomariov jáne tanymal jýrnalist Polina Shimanskaiamen birge Alma-Arasan shatqalynyń etegindegi zańsyz qurylys nysandaryn aralaýǵa sheshim qabyldap, qysqa jol Álmerek kóshesimen júrýdi uiǵardyq. Kósheniń boiymen júrgende aldymyzdan biik ári qymbat qorshaýlar men kúzet qyzmeti shyqty. Jergilikti jerde AJK AJ (AIS GZK), MJK (EGKN) derekterin qarap, Almaty qalasynyń Jer qatynastary basqarmasynan (DÝZR) málimetterdi surata otyryp, Almerek kóshesi endi joq ekenin, bul kósheniń orny jer telimi retinde jekemenshikke rásimdelip ketkenin anyqtadyq. Al jer teliminiń iesi Kúlibaeva Dinara Nursultanqyzy. Tekserýlerdi bastaimyz…", - deidi depýtat.
Tekseris barysynda depýtattar jekemenshikke ainalǵan jerdiń qyzmetkerimen sóilesti. Ol bul jerde buryn kóshe bolǵanyn bilmegenin aitady.
"Jumys istep júrgenime úsh aidai boldy. Basshylyqty kórgen emespin", - deidi qyzmetker.
Ǵimarattyń kúzetshisi de videoǵa túsirmeýdi surap, jekemenshik úi turǵan jerde buryn Álmerek kóshesi bolǵanyn bilmeitinin aitady.
Jekemenshikke ainalyp ketken kósheniń aimaǵy 12003 sharshy metr.
"Halyq Navoi kóshesine jetýi úshin joldy 20 minýt ainalyp ótýi kerek. Myńdaǵan adam zardap shegip otyr. Al munyń bári bir áýlettiń múddesi úshin. Al kúzetshiler úi ielerin úsh jyl kórmedik deidi", - deidi depýtat Sergei Ponomarev.
Baqytjan Bazarbek jol, dańǵyl, kósheler ortaq qoldaný aimaǵyna jatatynyn atap ótti.
"Iaǵni ortaq qoldanatyn aimaqtar jekemenshikke ótpeýi kerek. Zańdy jáne jeke tulǵalar da olai istei almaidy. Bul Jer kodeksiniń 26-babynda kórsetilgen. Ókinishke qarai, biz qazir óreskel jaǵdaiǵa tap bolyp otyrmyz. Iaǵni, shyn máninde jalpy paidalaný aimaǵy sanalatyn Álmerek kóshesi jeke menshikke ótip ketken. Aidaladaǵy bireý emes, eks-prezidenttiń qyzyna ótken", - deidi Bazarbek.
Depýtattyń sózinshe, bul kóshemen jergilikti halyq 2008-2009 jylǵa deiin júrip ótetin.
"Iaǵni qazir kósheni tolyǵymen buǵattap, jaýyp tastap, oǵan jer qosyp, eki ortadan jańa kadastrlyq nómirmen jerdi alǵan. Zańdy belshesinen batyp otyr. Osyndai tiisti qaýlyny shyǵarǵan ákimderdi tiisti jaýapkershilikke tartyp, kósheniń jolyn memleketke qaitarýymyz kerek", - deidi depýtat.
Eske salaiyq, buǵan deiin depýtat Baqytjan Bazarbek Almatynyń bókterinde salynǵan zańsyz qurylysty áshkerelegen bolatyn.
