Qyrǵyzstannyń burynǵy prezıdenti Asqar Aqaev joǵary keńeske eks-prezıdent mártebesin qaıtarýdy surap ótinish bildirdi, - dep habarlaıdy Dalanews.kz Alash.kz ulttyq portalyna siltep.
Bul týraly Konstıtýsıalyq zańnama, memlekettik qurylym, sot-quqyqtyq máseleler jáne reglament jónindegi parlament komıtetiniń tóraǵasy Cholpon Sultanbekova málimdedi.
Sultanbekovanyń aıtýynsha, Aqaevtan hat oǵan 5 qyrkúıek kúni tańda kelip túsken. Al Jogorký Keneshtiń spıkeri Nurlanbek Shákievtiń atyna 30 shildede kelip túsken. Depýtat Aqaevqa eks-prezıdent mártebesin qaıtarý máselesi kún tártibine enip-enbeıtinin jáne qashan talqylanatynyn túsindirdi.
«Aldymen fraksıalar, olardyń jetekshileri jáne depýtattarmen kelissózder júrgiziledi. Osydan keıin máseleni talqylaýǵa shyǵaratyn kúndi jarıalaımyz», – dep túsindirdi ol.
Aıta keteıik, Asqar Aqaevtyń uly Aıdar Aqaev 1998 jyly Nursultan Nazarbaevtyń qyzy Álıa Nazarbaevaǵa úılengen bolatyn. Ol kezde Álıa 18 jasta bolǵan.
Asqar Aqaev – táýelsiz Qyrǵyzstannyń alǵashqy prezıdenti. Ol respýblıkaǵa 1990 jyldan 2005 jylǵa deıin basshylyq etti. 2005 jylǵy 24 naýryzda Aqaevtardyń otbasylyq bıligine qarsy baǵyttalǵan halyqtyq kóterilis nátıjesinde ol prezıdenttik qyzmetten qulatyldy. Sol jyly Jogorký Kenesh ony «alǵashqy prezıdent» mártebesinen aıyrdy. 2010 jyly ýaqytsha úkimet te óziniń jarlyǵymen Asqar Aqaevty «eks» mártebesinen aıyrdy.
