Úkimet basshysy Kárim Másimov bastaǵan top Q.A.Iacsaýi atyndaǵy Halyqaralyq qazaq-túrik ýniversitetinde bilim salasyna qatysty jiyn ótkizdi. Jiynǵa jergilikti depýtattar men ziialy qaýym ókilderi, bilim salasynyń qyzmetkerleri qatysty.
Basqosýda qatysýshylar bilim salasyndaǵy túrli problemalardy kóterdi. Biri sabannan salynǵan mektepterge alańdaýshylyq tanytsa, kelesisi úsh aýysymdyq bilim uialarynyń jaǵdaiy mazalaitynyn jetkizdi.
Jiynǵa qatysýshylar úsh tildilik pen sýitsid jaiyna da nazar saldy. Aitýlarynsha, jyl basynan beri aimaqta 49 mektep oqýshysy men jastar sýitsidke barǵan. Jastardyń óz-ózine qol jumsaýyna qatysty pikir bildirgen Dariǵa Nazarbaeva barlyq jaýapkershilikti úkimetke jaýyp qoia salý durys emes dep sanaidy.
«Sýitsid dep kettińizder. Barlyq jaýapkershilikti úkimetke jabýǵa bolmaidy? Januia qaida? Balalar úide turady, áke-shesheleri, baýyrlary bar. «Ómirde ne qyzyqtyryp júr?» dep nege sondai suraqtardy qoimaisyzdar? Muǵalimder qaisysyna jetedi? Ata-ana úlken jumys jasaý kerek» degen vitse-premer qazaqta «kórshiniń balasy» dep salystyratyn ata-analardyń ol áreketi teris tárbie beretinin de jasyrmady. Al mektep pen balabaqsha tapshylyǵyna qatysty oiyn jetkizgen Dariǵa Nazarbaeva el demografiiasynyń artýyna ońtústikqazaqstandyqtardyń erekshe úles qosyp otyrǵany sonshalyq nátijesinde memleket mektep men balabaqsha salyp úlgere almai jatqanyn da aityp qaldy.
«Biz Q.A.Iassaýi kesenesinde boldyq. Onda barlyq jaqtan týrister keledi. Osy kesenelerdiń tarihy bar jerde qarasańyzdar tek qazaq tilinde jazylǵan. Nege? Munda orystar, sheteldik týrister kelmesin deisizder me? Durys emes ol», – dep oiyn jetkizgen vitse-premer úsh tildi meńgerý el abyroiyn sheteldikter aldynda asqaqtatyp jiberedi degen senimde.
Derekkóz: nur.kz
