Shyǵys Qazaqstan oblysy ákimdigi resmi túrde "Sol jaǵalaý profilaktoriii" dep atalatyn nysandy 1 mlrd 115 million teńgege saýdaǵa shyǵardy. Shart boiynsha keshendi bolashaq iesi úsh jyl senimgerlik basqarýǵa alady. Keiin tolyq satyp alýǵa quqyly, - dep habarlaidy Dalanews.kz Azattyqqa siltep.
Oblys ákimdiginiń aqparaty boiynsha ýaqytsha ielikke alatyn adam birinshi jyly 400 mln teńge, keiingi eki jylda 200 mln teńgeden investitsiia quiýy shart. Investor ǵimarattarǵa kúrdeli jóndeý júrgizip, nysandy konferents-zaly, jeke kovorkingter, qonaq úi nómirleri, sport alańdary jáne saýda pavilondary bar kópbeiindi ortalyqqa ainaldyrýǵa mindetti. Bir sózben aitqanda, bul jer "týristik-investitsiialyq hab" bolýǵa tiis dep jazylǵan aqparatta. Buǵan qosa keminde 25 adamdy jumyspen qamtý talaby da bar.
Jergilikti "ÝK-niýs" saitynyń málimetinshe, burynǵy prezident Nursultan Nazarbaev Shyǵys Qazaqstanǵa saparlap kelgeninde osynda toqtap júrýi múmkin. Keiingi jyldary blogerler bul jer oblystyń burynǵy ákimi Danial Ahmetovtiń "jeke demalys orynyna ainaldy" dep te dabyl qaqqanyn jazady basylym. Biraq muny Ahmetovtiń ózi joqqa shyǵaryp, nysanda balalar demalady degen.
Bul jerdi Arbat media basylymy da "Nazarbaev rezidentsiiasy" dep ataidy. Al "Ratel" saity "prezident rezidentsiiasy" deidi. Alaida oblys ákimdigi nysan "prezident rezidentsiiasy" emes, "Sol jaǵalaý profilaktoriii" dep málimdegen.
Al shyn máninde bul "saýyqtyrý keshenine" kimder barǵanyn táýelsiz derekter arqyly anyqtaý múmkin emes. 2022 jyly Shyǵys Qazaqstan oblysy ákimdigi atalmysh nysanǵa aeromassaj, gidromassajy bar SPA-bassein salý jóninde tender jariialaǵan bolatyn. Bul bastama qoǵam belsendileri tarapynan synǵa qalǵan. Jýrnalist Denis Danilevskii sol jyly nysandy halyqty emdeitin shipajaiǵa ainaldyrý jóninde talap qoiyp, oblys ákimdigine hat joldaǵan. Biraq onyń talaby oryndalǵan joq.
2022 jylǵy Qańtar oqiǵasynan keiin Qazaqstanda "prezident rezidentsiiasy" dep atalyp kelgen nysandar qoǵam ieligine berile bastady. Máselen, prezident Qasym-Jomart Toqaev byltyr Qostanai, Aqtaý, Taraz, Atyraý jáne Aqtóbedegi rezidentsiialaryn balabaqsha nemese balalar lagerine ainaldyrýdy tapsyrǵan.
