Belgili jýrnalist, tanymal jobalardyń avtory Sanjar Kerimbai Nartai Aralbaiulyna bergen suhbatynda eks-prezident Nazarbaevty qýys keýde dep atady, - dep habarlaidy Dalanews.kz.
Onyń sózinshe, Nazarbaev bir kezde halyq úshin ideal tulǵa bolyp kóringen. Alaida keiin ol bastapqy baǵytynan taiqyǵan.
"Halyq 90-shy jylǵy daǵdarystan eseńgirep, ashtan ólip qala jazdap, zorǵa shyqqan kezinde, shynymen de,
Nazarbaev investitsiia tartyp, halyqty gúldendirip, teńge shyǵyp jatqan kezde sumdyq reformator siiaqty kórinip, adamdarǵa qatty áser etti.
Onyń harizmasy, adamdy sendirip sóileitinin, túr symbatynyń da symbatty bolǵanyn eshkim joqqa shyǵara almaidy. Adamdarǵa qatty úmit syilaǵany, halyq "mynaý bizdi órge súireidi" dep, tipti onyń qasynda júrgen serikteri oǵan qatty úmit artqany - bári ras qoi. 2005 jyly bilikti qolyna túsirip alǵannan keiin "mynaý basqa baǵytqa kete bastady, toqtataiyq" dep, "eldiń kózin ashamyz" dep maidanǵa qoryqpai shyqqan erjúrek batyrlardyń úsh-tórteýi ólip ketti", - deidi Kerimbai.
Jýrnalist Nazarbaevtyń "qýys keýde bolýy" balalyq shaǵynan bastalǵan degen pikirde.
"Solai dep aitýǵa bolady (qýys keýde dep - esk.). Balalyq shaǵy jaily jazǵan kitaptaryn oqydym ǵoi. Ásirese, kishkentai kezindegi kitaptaryn oqityn bolsańyz, Mańǵystaýdyń, Qyzylordanyń, Jambyl oblysynyń, Jezqazǵannyń jigitteri siiaqty qazaqy aýylda, kileń qazaqtyń arasynda Arqanyń ánin tyńdap óspegen kisi ekeni kórinip tur. "Bizdiń aýylymyz internatsionaldy aýyl, 99 ulttyń balalarymen aralasatyn edik" dep baiaǵy keńestik mentalitetpen, maqtanyshpen jazǵan. Bul maqtanyp aitatyn nárse emes. Sondyqtan kishkentai kezinde ulttyq tárbie boiyna sińgeni kórinbeidi.
...8-synybynan bastap Ýkrainaǵa ketip, orystardyń arasynda ósken adamnyń qalyptasýy kezeńi solai bolǵannan keiin eski tanystaryna qarap, búiregi buryp turady.
Men bul kisimen jumys istesken adamdarmen sóilesip kórdim. Sonda "bul kisiniń ulttyq memleket qurýǵa eshqandai da bir nieti joq" dep aitatyn.
30 jyl qolynda telegei teńiz bilik turǵan kezinde ulttyq memleket qura almady, shansty paidalana almady. Qur bosqa qazaq mádenietin, ádebietin talqandap, bel omyrtqasyn úzip jiberdi", - deidi ol.
