"Qurmetti otandastar! Pandemiia saldarynan Qazaqstan búkil álem elderimen birge kútpegen qiyndyqtarǵa tap bolyp, jahandyq daǵdarystyń eń qiyn kezeńin bastan ótkerýde. Áleýmettik-ekonomikalyq ahýaldyń kúrt nasharlaýy nátijesinde damyǵan memleketter de daǵdaryspen kúresýde. Mundai jaǵdaida kez kelgen úkimettiń aldynda turǵan eń ózekti másele – ekonomikanyń damýy jáne el azamattarynyń densaýlyǵy. Bizge halyqtyń qaýipsizdigi men amandyǵy úshin bar kúsh-jigerimizdi salý mańyzdy. Sondyqtan Prezidentimiz, Úkimetimiz kóp sharalardy qolǵa alyp jatqanyn bilesizder. Osy oraida meditsina qyzmetkerlerine erekshe alǵysymdy bildiremin. Olar pandemiianyń alǵashqy kúnderinen bastap koronavirýsqa qarsy kúrestiń aldyńǵy shebinde júr", - dedi Elbasy.
Sondai-aq partiia tóraǵasy volonterlarǵa alǵys aityp, depýtattarǵa qatysty qoǵamdaǵy synǵa da toqtaldy.
"Biz Birgemiz!" aktsiiasy aiasynda ǵana "Jas Otan" barlyq muqtaj jandarǵa qoldaý kórsetken bes myń eriktiniń basyn biriktirdi. Árine, kemshilikter de boldy.
Koronavirýs daǵdarysy memlekettik basqarýdyń keibir salalarynda olqy tustar bar ekenin de kórsetti. Jedel áreket etý jaǵy jetispei jatty, máseleniń sheshilýi biýrokratiialyq kedergilerge kep tireldi.
Memlekettik organdar men keibir basshylar halyqtyń naqty problemalaryn jete sezinbeidi degen syn aitylyp júrgenin men jaqsy bilemin. Bul barlyq deńgeidegi depýtattardyń da jumysyna qatysty. Ony kóbine oryndy syn dep esepteimin. Depýtattar halyqtyń ortasynda bolyp, eldiń muń-muqtajyn jetkizýge tiis. Depýtattardyń mindeti – árdaiym el múddesin qorǵaý. Osyny umytpaýymyz kerek", - dedi ol.
Konstitýtsiialyq reforma úsh jyl buryn júrgizildi.
"Partiialyq-saiasi júieni tereńnen qaýzap, jańǵyrtýǵa negiz qalandy. Parlamenttiń róli men Úkimettiń el aldynda esep berý talaby kúsheitildi. Ókiletti organdardy sailaýdyń proportsionaldy júiesine kóshý júzege asyryldy. Biyl saiasi partiialardy tirkeýde san jaǵy eki ese azaityldy. Partiialyq tizimdegi áielder men jastarǵa 30% kvota zańmen engizildi. Bul bilikke jańa betburystardy usynýdyń qainar kózi bola alatyn - óz salasynyń kánigi mamany, bedeldi kóshbasshysy, el taǵdyryna alańdaityn, sheshim qabyldai alatyn jáne syndarly usynystar jasai alatyn adamdar, - delingen Elbasy saitynda jariialanǵan habarlamada.
Nazarbaev ortaq maqsat - eldiń erteńi ekenin basa atap ótti.
"Qurmetti otandastar! Biz Táýelsizdiktiń 30 jyldyǵy qarsańynda turmyz. Ǵasyrǵa teń keletin jol júrip óttik. Bizdiń býyn aýyrtpalyǵy mol daǵdarys kezeńinde egemen memleket qurdy. Ulttyq ekonomika qalyptasty. Shekaramyz shegendeldi. Qazaqstan álemge beibitsúigish el retinde tanyldy. Biz turaqtylyq pen kelisimdi saqtai bildik. Birtutas ultqa ainaldyq. Biraq aldymyzda áli de kóptegen qiyndyqtar bar ekeni anyq.
Men árdaiym aityp kelemin jáne qazir de qaitalap aitamyn: "Táýelsizdikke qol jetkizý bir bólek, ony kózdiń qarashyǵyndai qorǵap, nyǵaityp, keler urpaqqa tapsyrýǵa tiispiz".
Sondyqtan jiǵan tájiribemizge súienip, ótken kúnnen sabaq alyp, alǵa umtylýymyz kerek. Ortaq maqsat – eldiń erteńi, halyqtyń bolashaǵy jolynda birige alatyndar ǵana tabysqa qol jetkizetinin umytpaiyq", - dedi sóz sońynda Nursultan Nazarbaev.
