Nazarbaev "Bilik tarmaqtarynyń bastama kóterýi tym álsiz"
– Búgin Parlament jańa jaǵdaida óz jumysyn bastaidy. Onyń palataraly men Úkimetke qosymsha ókilettilik, demek jaýapkershilik júktelip otyr. Ashyǵyn aitaiyn, bilik tarmaqtarynan bastamalar óte álsiz kóteriledi. Múmkin meniń de kinám bar shyǵar. Mindetti túrde aitý kerek. Ótken joly Úkimetti aýystyrǵan kezde de aityp edik. Qazirde sol jaǵdai oryn alýda. Munan ary osyndai jaǵdaiǵa jol bermeý kerek. Barlyǵy da Konstitýtsiia, Zań boiynsha jazylǵan. Árbir ministr óz ýchaskesine jaýap beredi jáne jaýapkershilik arqalaidy, – dedi Nursultan Nazarbaev.
Elbasynyń atap ótýinshe, Úkimet elimizdiń ekonomikalyq saiasatyna jáne belgilengen barlyq baǵdarlamalardyń júzege asyrylýyna tolyqtai jaýap beredi. Al Parlament zań shyǵarýshy ári baqylaýshy bilik retinde óz ókilettigin júzege asyrady.
– Qazir negizgi júkteme atqarýshy bilikke túsip otyr. Praktikalyq mindetter atqarýshy bilikke júktelgen. El Úkimeti negizinen zań jobalaý jumysynyń jyldyq jospary aiasynda zań jobalarynyń ázirleýshi bolyp qalýda, – dedi Elbasy. Memleket basshysy Parlament depýtattary zańnamalyq bastamalardy jii kóter bastaǵandyǵyn aityp, ony pozitivti qubylys dep baǵalady. «Bul rette shaǵyn vedomstvolyq nemese óńirlik ǵana emes jalpy memlekettik múddeni ár ýaqytta eskergen jón. Biz muny baqylap otyrmyz. Árbir depýtattyń óz sailanǵan óńirge unaǵysy keletindigi túsinikti de. Bul álemniń barlyq parlamentterinde bar. Biraq Konstitýtsiia men «Parlament týraly» Zańǵa sáikes barlyǵymyz da halyqqa jumys isteimiz dep aiqyndadyq. Sonda barlyq óńirge jaqsy bolady», – dedi Nursultan Nazarbaev.
