– بۇگىن پارلامەنت جاڭا جاعدايدا ءوز جۇمىسىن باستايدى. ونىڭ پالاتارالى مەن ۇكىمەتكە قوسىمشا وكىلەتتىلىك، دەمەك جاۋاپكەرشىلىك جۇكتەلىپ وتىر. اشىعىن ايتايىن، بيلىك تارماقتارىنان باستامالار وتە ءالسىز كوتەرىلەدى. مۇمكىن مەنىڭ دە كىنام بار شىعار. مىندەتتى تۇردە ايتۋ كەرەك. وتكەن جولى ۇكىمەتتى اۋىستىرعان كەزدە دە ايتىپ ەدىك. قازىردە سول جاعداي ورىن الۋدا. مۇنان ارى وسىنداي جاعدايعا جول بەرمەۋ كەرەك. بارلىعى دا كونستيتۋسيا، زاڭ بويىنشا جازىلعان. ءاربىر مينيستر ءوز ۋچاسكەسىنە جاۋاپ بەرەدى جانە جاۋاپكەرشىلىك ارقالايدى، – دەدى نۇرسۇلتان نازاربايەۆ.
ەلباسىنىڭ اتاپ وتۋىنشە، ۇكىمەت ەلىمىزدىڭ ەكونوميكالىق ساياساتىنا جانە بەلگىلەنگەن بارلىق باعدارلامالاردىڭ جۇزەگە اسىرىلۋىنا تولىقتاي جاۋاپ بەرەدى. ال پارلامەنت زاڭ شىعارۋشى ءارى باقىلاۋشى بيلىك رەتىندە ءوز وكىلەتتىگىن جۇزەگە اسىرادى.
– ءقازىر نەگىزگى جۇكتەمە اتقارۋشى بيلىككە ءتۇسىپ وتىر. پراكتيكالىق مىندەتتەر اتقارۋشى بيلىككە جۇكتەلگەن. ەل ۇكىمەتى نەگىزىنەن زاڭ جوبالاۋ جۇمىسىنىڭ جىلدىق جوسپارى اياسىندا زاڭ جوبالارىنىڭ ازىرلەۋشى بولىپ قالۋدا، – دەدى ەلباسى. مەملەكەت باسشىسى پارلامەنت دەپۋتاتتارى زاڭنامالىق باستامالاردى ءجيى كوتەر باستاعاندىعىن ايتىپ، ونى ءپوزيتيۆتى قۇبىلىس دەپ باعالادى. «بۇل رەتتە شاعىن ۆەدومستۆولىق نەمەسە وڭىرلىك عانا ەمەس جالپى مەملەكەتتىك مۇددەنى ءار ۋاقىتتا ەسكەرگەن ءجون. ءبىز مۇنى باقىلاپ وتىرمىز. ءاربىر دەپۋتاتتىڭ ءوز سايلانعان وڭىرگە ۇناعىسى كەلەتىندىگى تۇسىنىكتى دە. بۇل الەمنىڭ بارلىق پارلامەنتتەرىندە بار. ءبىراق كونستيتۋسيا مەن «پارلامەنت تۋرالى» زاڭعا سايكەس بارلىعىمىز دا حالىققا جۇمىس ىستەيمىز دەپ ايقىندادىق. سوندا بارلىق وڭىرگە جاقسى بولادى»، – دەدى نۇرسۇلتان نازاربايەۆ.
