Memleket basshysy N.Nazarbaev Parlament Májilisiniń plenarlyq otyrysyna qatysty, dep habarlaidy Dalanews.kz Aqordaǵa silteme jasap.
Qazaqstan Prezidenti Parlament Májilisiniń depýtattaryna arnalǵan sózinde burynǵy Úkimettiń jahandyq damýdyń kúrdeli jaǵdaiyna qaramastan ekonomikanyń ósimin saqtaýǵa kúsh salǵanyn atap ótip, Úkimet múshelerine atqarǵan jumysy úshin rizashylyq bildirdi.
– Premer-Ministr Baqytjan Saǵyntaev týraly arnaiy aitqym keledi. Ol buǵan deiin Pavlodar oblysynyń ákimi, ekonomika ministri, vitse-premer, birinshi vitse-premer laýazymdaryn laiyqty atqaryp, ózin jaqsy qyrynan kórsetti. Baqytjan Saǵyntaev – adal ári tájiribeli azamat. Ol basqa da salalarda qyzmet ete alady. Biraq, jekelegen ministrlikterdiń, ásirese áleýmettik saladaǵy vedomstvolardyń, jumysyndaǵy olqylyqtar búkil Úkimettiń otstavkaǵa ketýine ákep soqtyrdy, – dedi Elbasy.
Nursultan Nazarbaev halyqaralyq arenadaǵy turaqsyzdyq pen sanktsiialyq teketirester elimizdiń ál-aýqatyn nyǵaitý úshin tyń sharalar men sheshimder qabyldaýdy talap etetinin aitty.
Sonymen qatar, Memleket basshysy júrgizilgen saiasi jańǵyrýdyń nátijelerine toqtalyp, onyń aiasynda bilik tarmaqtary arasynda ókilettikterdiń qaita bólingenin atap ótti.
– Úkimet ózine qajetti quzyrettiń bárin aldy. Endi, halyq aldyndaǵy mindetterin minsiz atqaryp, óz qyzmeti úshin jaýapty bolýǵa tiis. Mundai jaýapkershilik áleýmettik jáne ekonomikalyq baǵdarlamalardyń tiimdiligine tikelei jaýap beretin túrli deńgeidegi ákimderge de júkteledi. Olar turǵyndardyń aryz-shaǵymdaryna jedel jaýap berip, eń bastysy, tiisti sharalar qabyldaýy qajet, – dedi Qazaqstan Prezidenti.
Elbasy Parlamenttiń áleýmettik-ekonomikalyq saiasatty júzege asyrý isindegi róline toqtaldy.
– Áńgime zań jobalaryn sapaly ázirleý ǵana emes, sondai-aq mańyzdy memlekettik baǵdarlamalar men jobalardy iske asyrý jóninde bolyp otyr. Bul parlamenttik monitoringti turaqty júrgizý, úkimettik emes sektordyń qatysýymen dialog alańdaryn qurý, halyqqa qabyldanyp jatqan memlekettik, sonyń ishinde zańnamalyq sharalardyń mánin túsindirý máselelerine de qatysty, – dedi Nursultan Nazarbaev.
Memleket basshysy jańa Úkimettiń memlekettik baǵdarlamalardy odan ári júzege asyrýǵa, quqyq qorǵaý jáne sot júiesindegi reformalardy aiaǵyna deiin jetkizýge, turǵyndardyń problemalaryn naqty sheshýge tiis ekenin atap ótti.
Nursultan Nazarbaev Konstitýtsiianyń 44-babyna sáikes Qazaqstan Respýblikasy Premer-Ministri laýazymyna taǵaiyndaýǵa kelisim berý úshin Asqar Maminniń kandidatýrasyn Parlament Májilisiniń qaraýyna usyndy.
– Ol jumys istegen jyldary ózine senip tapsyrylǵan qyzmetterde naqty nátijelerge qol jetkizdi. Asqar Uzaqbaiuly ózin tájiribeli menedjer retinde kórsetti. Jańa Úkimettiń tiimdi jumysyn qamtamasyz etý úshin Asqar Uzaqbaiuly Maminniń kandidatýrasyn laiyqty dep sanaimyn, – dedi Memleket basshysy.
Parlament Májilisiniń depýtattary Premer-Ministr laýazymyna Asqar Maminniń kandidatýrasyn biraýyzdan maquldady.
Plenarlyq otyrys barysynda Nursultan Nazarbaev Asqar Mamindi Qazaqstan Respýblikasynyń Premer-Ministri laýazymyna taǵaiyndaý týraly tiisti jarlyqqa qol qoidy.
Elbasy áleýmettik saiasatymyzdyń negizgi basymdyqtary jóninde aityp, indýstriialyq baǵdarlamany oryndaý barysynda otandyq óndiristi damytý qajettigine nazar aýdardy.
Foto: sputniknews.kz saitynan
