Olardyń jazýynsha, Navalnyı Tomskiden Máskeýge ushyp bara jatqan kezde ıaǵnı, ýlanardyń aldynda bolǵan oqıǵalardy esine túsirýi múmkin.
Joǵaryda atalǵan basylymdardyń málimetinshe, Navalnyıǵa dáriger men áıelinen basqa adamdardy da kirgize bastaǵan. Biraq saıasatkermen kezdesý úshin qatań kúzetten ótý kerek. Al saıasatkerdiń baspasóz hatshysy Kıra Iarmysh maqalalardaǵy keıbir jaıttar ulǵaıtylyp kórsetkenin jazdy.
Der Spiegel aqparat kóziniń aıtýynsha, «Sharıte» klınıkasynda kúzet kúsheıgen. Navalnyıdyń esin jıǵany týraly aqparat shyqqannan keıin 9 qyrkúıekte keshke qaraı saıasatker jatqan aýmaq qaýipsizdiktiń «eń joǵary deńgeıi» rejımine kóshken.
Aqparat kóziniń aıtýynsha, Germanıanyń arnaıy qyzmeti tek qoqan-loqy ǵana emes, «Sharıte» klınıkasyn qaralaý sıaqty «jalǵan aqparattar legine» tótep berýge qamdanyp jatyr.
Dárigerlerdiń aıtýynsha, Navalnyı fızıkalyq turǵyda 90 paıyz qalpyna kele alady, al psıhıkasy tolyq qalypqa kelgen. Olar Ombyǵa ushaqty shuǵyl túrde qondyrý týraly sheshim qabyldaǵan ushqyshtyń jyldam reaksıasy men Navalnyıǵa atropın dárisin ekken jedel járdem qyzmetkerleriniń áreketi aman qalýyna qatty kómektesti dep otyr.
Buǵan deıin Die Zeit basylymy qupıa derekkózge súıene otyryp, Navalnyıǵa «Novıchoktan» da qaýiptirek ý bergen, ony tek arnaıy jabdyqtalǵan zerthanada ǵana jasaýǵa bolady, sondyqtan bul operasıany reseılik FSB uıymdastyrǵan bolýy yqtımal dep jazǵan edi.
Gazettiń málimetinshe, nemis bıligi saıasatkerdi ańdyǵan arnaıy qyzmet ókili qaýipti zatty Navalnyı sháı ishken keseniń jıegine nemese keseniń ózine shashyp ketken bolýy múmkin dep boljap otyr. Ýdyń qaldyqtary saıasatker sý ishken bótelkeniń aýzy men saıasatkerdiń qolynan da tabylǵan
Nemis basylymynyń jazýynsha, ýdyń áser etý ýaqytyn eseptegen qylmyskerler Navalnyı Tomskiden Máskeýge qaraı ushqan kezde jolda qaıtys bolady dep shamalaǵan bolýy múmkin.
Reseılik oppozısıoner, Jemqorlyqpen kúres qorynyń jetekshisi 44 jastaǵy Navalnyı 20 tamyz kúni Tomskiden Máskeýge baǵyt alǵan ushaqta jaǵdaıy kúrt nasharlaǵan. Ushaq saıasatker densaýlyǵynyń nasharlaýyna baılanysty Omby qalasyna qonýǵa májbúr bolǵan. Saıasatker Omby aýrýhanasynda eki kún jatty. Ondaǵy dárigerler Navalnyıdyń zat almasý prosesi buzylǵan dep málimdedi. Olar "saıasatker ýlandy" degen Navalnyı jaqtastarynyń tujyrymyn joqqa shyǵarǵan. Degenmen "Medýzanyń" jazýynsha, Ombyda saıasatkerdiń ýlanǵany "aıdan anyq bolǵandyqtan" jedel járdem kóliginde oǵan atropın salǵan.
22 tamyzda týystary men jaqtastarynyń talabymen saıasatker Berlındegi «Sharıte» klınıkasyna aýystyryldy. Nemis dárigerleri zerthanada teksergennen keıin Germanıa úkimeti Alekseı Navalnyı quramy jaǵynan sovet odaǵy kezinde shyǵarylǵan áskerı «Novıchok» ýyna uqsas zatpen ýlandy dep málimdedi.
Dúısenbi kúni nemis dárigerleri Navalnyıdyń densaýlyǵy jaqsarǵanyn, komadan shyqqanyn habarlaǵan edi.
