Kúni keshe, 30 qazan kúni Almaty qalasy Naýryzbai aýdanyndaǵy №214 mektepte Dala, Kenjetaev jáne Jýaly kósheleriniń turǵyndary qatysqan kezdesý ótti. Jiynda elektrmen qamtý, sýmen jabdyqtaý jáne aýyz sýdyń sapasyna qatysty ózekti máseleler talqylandy, dep habarlaidy Dalanews.kz.
Kezdesýge Almaty qalalyq Energetika jáne sýmen jabdyqtaý basqarmasy, «Taraz Enerdji» JShS jáne «Almaty Sý» mekemesiniń ókilderi qatysty.
Kezdesý qorytyndysy boiynsha:
- Energetika jáne sýmen jabdyqtaý basqarmasy Dala jáne Jýaly kóshelerindegi úilerge arnalǵan transformatorlyq podstantsiialardy qarasha aiynyń sońyna deiin qosyp bitirý týraly sheshim qabyldady;
- «Taraz Enerdji» JShS Shuǵyla shaǵyn aýdanyndaǵy elektr jelilerin jańǵyrtý jumystaryn 2025 jylǵy 20 qarashaǵa deiin aiaqtaýǵa mindetteldi;
- «Almaty Sý» mekemesi sýdyń sapasyna bailanysty shaǵymdarǵa orai erteńnen bastap jergilikti jerge mamandar jiberip, sý jelilerin tekserip, búlingen plombalardy qalpyna keltiredi.
Sonymen qatar ashyqtyqty qamtamasyz etý maqsatynda «Almaty Sý» ókilderi turǵyndarmen birge sý eseptegish quraldarynyń kórsetkishterin tirkeýge qatyspaq. Bul plombalardyń búlinýine jol bermeý úshin jasalady.
Aita ketsek, atalǵan kóshelerdegi sý júieleri búginde «Almaty Sý» mekemesiniń balansyna ótken. Sondyqtan barlyq apatty jáne qalpyna keltirý jumystary tegin júrgiziledi.
Eske salaiyq, buǵan deiin belgili jýrnalist Aibar Oljai Dala kóshesi turǵyndarynyń uzaq ýaqyt boiy sheshimin tappai kelgen máselelerin kótergen edi. Olar on jyldan astam ýaqyt boiy qalanyń balansyna qabyldanbai, turǵyndary elektr jaryǵyn jekemenshik kompaniialardan birneshe ese qymbat baǵaǵa satyp alýǵa májbúr bolǵan.
"Tariftiń qymbattyǵy óz aldyna. Tipti sol jaryq apta saiyn 4-5 ret sónedi. Qazir úi eki kúnnen beri jaryqsyz otyr. Naýryzbai aýdany ákimdigi úidi qala balansyna qosamyz dep sońǵy 5 jyl boiy ýáde berip keledi. Biraq is júzinde eshqandai nátije joq", - deidi Oljai.
Onyń aitýynsha, biyl kóktemde kóshe turǵyndary Naýryzbai aýdanynyń ákimi Nazira Toǵyzbaevamen kezdesip, máseleni talqylaǵan. Ákim sol kezde “másele qysqa merzimde sheshiledi, tarif kóterilmeidi” dep ýáde bergen. Alaida arada birneshe ai ótse de, naqty nátije joq, kerisinshe tarif 1 kVt úshin 48–52 teńgege deiin kóterilgen.
“Al Dala kóshesinde jaryq jii sónedi. Úilerinde tórt kishkentai bala bar. Qysta olar tipti úidi jylytý úshin gaz qazandyǵyn qosa almaidy. Sebebi ol elektr qýatyna táýeldi. Qaqaǵan qys kele jatyr. Almatynyń ortasynda otyrǵan bul otbasynyń taǵdyry kádimgidei alańdatyp otyr. Nazira Asylbekqyzy óte isker ákim. Osy máseleni tez sheshedi degen úmit bar”, — dep túiindedi jýrnalist.
