Almatyda álemniń 25 elinen kelgen 3 myńǵa jýyq qatysýshynyń basyn qosqan BE WOMAN ASIA 2026 halyqaralyq forýmy ótti. Jiynda jasandy intellektiniń damýy, áielderdiń qoǵamdaǵy róli, kásipkerlik, áleýmettik teńsizdik jáne kóshbasshylardyń jaýapkershiligi talqylandy, dep habarlaidy dalanews.kz.
15 qazanda Respýblika saraiynda ótken forým biyl "Etika kúshi" taqyrybyna arnaldy. Halyqaralyq basqosýǵa 100 spiker men 60 mentor qatysty. Olardyń qatarynda álemge tanymal kásipkerler, qoǵam qairatkerleri, tehnologiia salasynyń mamandary men halyqaralyq uiymdardyń ókilderi boldy.
Forýmnyń ashylýynda Mádeniet jáne aqparat vitse-ministri Evgenii Kochetov Erlan Qarinniń quttyqtaý hatyn oqyp berdi. Onda jahandyq ózgerister jaǵdaiynda adami kapitaldy damytý, bilim men innovatsiiaǵa basymdyq berý jáne jasandy intellektini jaýapkershilikpen paidalaný qajettigi aitylǵan.
Jasandy intellekt pen kóshbasshylar jaýapkershiligi
Forýmnyń basty qonaqtary qatarynda sýpermodel, qaiyrymdylyqpen ainalysatyn Natalia Vodianova, Zuckerberg Media kompaniiasynyń negizin qalaýshy Rendi Tsýkerberg, Jo Loves brendin qurǵan Djo Maloýn jáne eki márte "Oskar" syilyǵyn ielengen rejisser Sharmin Obaid-Chinoi boldy.
Rendi Tsýkerberg jasandy intellektiniń biznes pen kúndelikti ómirge yqpalyna toqtalsa, Natalia Vodianova qoǵam aldyndaǵy jaýapkershilik pen tanymaldyqty áleýmettik máselelerdi sheshýge paidalanýdyń mańyzyn qozǵady.
Al Sharmin Obaid-Chinoi kino óneriniń qoǵamdaǵy qalyptasqan kózqarastardy ózgertýge jáne kópshilik nazarynan tys qalǵan máselelerdi kóterýge múmkindik beretinin aitty.
Ortalyq Aziia álemge ózin qalai tanyta alady?
Forým aiasynda Ortalyq Aziia elderiniń halyqaralyq bedelin arttyrý, mádeni murasyn nasihattaý jáne kreativti ekonomikany damytý máseleleri de sóz boldy.
Ózbekstannyń Mádeniet jáne ónerdi damytý qorynyń tóraiymy Gaiane Ýmerova óńir elderi óz ereksheligin saqtai otyryp, mádeni yntymaqtastyqty kúsheitýi qajet ekenin jetkizdi.
Al Dala Edge Creative Tech Park teń quryltaishysy Danat Jumin Ortalyq Aziia memleketterin ózara básekelesýden góri ortaq jobalardy damytýǵa shaqyrdy.
"Joq nárse úshin básekelesýdi doǵaraiyq. Bolashaqta bolatyn nárse úshin básekeleseiik. Bir-birimizben emes, ózgelermen básekeleseiik. Men Ortalyq Aziiany qoldaimyn", – dedi ol.
Áielderdiń múmkindigin shekteitin qandai kedergiler bar?
Jiynda áielderdiń bilim alýyna, eńbek naryǵyna aralasýyna jáne kásibi damýyna kedergi keltiretin máseleler de kóterildi.
Qazaqstandaǵy "BUU-Áielder" qurylymynyń ókili Djeren Giýven Giýres áielderge qatysty zorlyq-zombylyq, aqy tólenbeitin úi eńbegi jáne tehnologiia salasyndaǵy genderlik teńsizdik máselelerine nazar aýdardy.
Kásipker, Garvard ýniversitetiniń túlegi Ásel Amangeldi árbir áieldiń óz bolashaǵyn derbes tańdaýǵa múmkindigi bolýy kerektigin aitty.
"Ár qyzdyń óz bolashaǵyn ózi tańdaý quqyǵy sirek beriletin artyqshylyq emes, qalypty jaǵdai bolýy tiis", – dedi ol.
Sondai-aq qoǵam qairatkeri Lázzat Qaltaeva múmkindigi shekteýli azamattardyń qoǵam ómirine tolyqqandy aralasýy úshin teń jaǵdai qalyptastyrý qajettigin kóterdi.
Forýmnyń maqsaty qandai?
BE WOMAN halyqaralyq platformasynyń negizin qalaýshy, kásipker Janna Kannyń aitýynsha, bastamanyń negizgi maqsaty – Ortalyq Aziiany jahandyq máseleler talqylanatyn alańǵa ainaldyryp qana qoimai, óńir ókilderiniń halyqaralyq sheshimderge yqpal etýine múmkindik jasaý.
"BE WOMAN ASIA – Ortalyq Aziia jahandyq kún tártibiniń syrttai baqylaýshysy bolmai, ony qalyptastyrýǵa qatysatyn platforma. Jasandy intellekt dáýirinde kúsh yqpaldyń aýqymymen emes, jaýapkershilikpen ólshenedi", – dedi Janna Kan.
Aita keteiik, BE WOMAN bastamasy halyqaralyq forým ótkizýmen shektelmeidi. Joba aiasynda áielderdiń tsifrlyq qaýipsizdigin qamtamasyz etý, bilim granttaryn usyný jáne kásipker áielderdiń startaptaryn qoldaý baǵytyndaǵy baǵdarlamalar júzege asyrylyp jatyr.
16 qazanda forým praktikalyq kezdesýlermen, sheberlik sabaqtarymen jáne sarapshylardyń qatysýymen ótken talqylaýlarmen jalǵasty.
